«Толибон» ҳаракати Афғонистоннинг ўз назорати остида бўлган ҳудудларида Қизил Хоч халқаро қўмитасининг фаолиятига қўйилган тақиқни бекор қилди. Бу ҳақда «Толибон» вакили Забиҳулла Мужаҳиднинг баёнотига таяниб, «Коммерсантъ» хабар берди.
Жорий йилнинг апрель ойида «Толибон» жангарилари Қизил Хоч қўмитаси ва Бутунжаҳон соғлиқни сақлаш ташкилотининг фаолиятига тақиқ қўйганди. Уларнинг таъкидлашича, ушбу ташкилотлар вакцинация вақтида «шубҳали» тадбирларни ўтказган ва ўз ваколатлари доирасида иш кўрмаган.
Тақиқнинг бекор қилиниши нимага боғлиқ эканлиги номаълум. Қизил Хоч ва Халқаро соғлиқни сақлаш ташкилоти ушбу баёнотга изоҳ бермади.
Эслатиб ўтамиз, август ойида АҚШ ва «Толибон» Афғонистондаги можаро бўйича ўтказилган музокаралар натижасида келишувга эришилганини билдирган эди. AP агентлигининг маълумотларига кўра, улар Америка қўшинларини олиб чиқиб кетиш бўйича бир тўхтамга келган. «Толибон» жангарилари эса ўз навбатида ИШИД ва «Ал-Қоида» каби террорчилик гуруҳлари билан алоқаларини узиши керак бўлган.
Сентябрь ойининг бошида эса АҚШ президенти Дональд Трамп Кобулда содир бўлган терактдан сўнг, «Толибон» билан музокаралар ўтказилмаслигини эълон қилганди.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)