Fransiyaning Louvre Hotels Group kompaniyalar guruhi Damashqda ikkita mehmonxona ochadi. Bu haqda Le Monde’ga asoslanib, Meduza xabar bermoqda.
Besh yulduzli Royal Tulip Semiramis va to‘rt yulduzli Golden Tulip Mazzeh mehmonxonalari 2020-yil bahorida — ular joylashadigan binolar qayta tiklanganidan so‘ng ish boshlashi kutilmoqda.
France 24 telekanali xabariga ko‘ra, bu 2012-yili fuqarolar urushi boshlanganidan beri Suriyaga kelgan ilk G‘arb mehmonxona tarmog‘idir.
Louvre Hotels Group — jahondagi eng yirik mehmonxona tarmoqlaridan biri. Uning boshqaruvi ostida jahonning 54 mamlakatida 1,5 mingdan ortiq mehmonxonalar bor. Kompaniya 2015-yildan beri xitoylik investorlarga tegishli.
2010-yili Suriyaga 8,5 million nafar chet ellik tashrif buyurgan edi. 2018-yilda mamlakatga kelgan xorijlik fuqarolar soni 1,8 million nafarni tashkil etgan.
Qayd etish joiz, poytaxt Damashq fuqarolar urushi boshidan beri prezident Bashar Asad hukumati nazorati ostida bo‘lib turibdi.
Izoh (0)