Turkmanistonda sement sotib olmoqchi bo‘lgan fuqarolardan nikoh tuzilganligi haqidagi guvohnoma talab qilina boshladi

Turkmanistonning Lebap viloyatida “Turkmansement” ishlab chiqarish birlashmasi do‘konlarida xaridorlardan nikoh tuzilganligi yoki bekor qilinganligi to‘g‘risidagi guvohnoma talab qilina boshlandi, deb xabar beradi Fergana News.

Oilaviy ahvol to‘g‘risidagi hujjatga qo‘shimcha ravishda, xaridor yashash joyidan kafolat xati va qurilish uchun yer ajratish bo‘yicha tuman arxitektura bo‘limidan tasdiqnoma taqdim etishi kerak. Ushbu uchta hujjat birgalikda insonning haqiqatan ham biror narsa qurishni rejalashtirayotganini tasdiqlaydi. Aks holda, sement sotilmaydi.

Biroq, barcha hujjatlarni taqdim etganlar darhol sement olmaydi. Ular faqat navbatga yoziladi. “Turkmansement” do‘konlari kam mahsulotni olib keladi, shuning uchun xaridorlar kutishlari kerak. Sementni xususiy savdogarlardan ham sotib olish mumkin, lekin ularga bir qop sement uchun 28 manat ($8) emas, 120 manat ($34) to‘lashga to‘g‘ri keladi.

Turkmanistonda sement yetishmasligi haqidagi xabarlar 2019-yil aprel oyidan boshlab mustaqil ommaviy axborot vositalarida paydo bo‘ldi.

May oyida Toshhovuz, iyun oyida Mari va Lebap viloyatlaridagi davlat do‘konlarida sement sotilishi to‘xtatilgan, xususiy tadbirkorlarda ushbu qurilish materialining narxi keskin oshgan edi.