“Meni nohaq ishdan bo‘shatishdi”. Qashqadaryolik tez tibbiy yordam haydovchisi rahbariyatini adolatsizlikda ayblamoqda

“Daryo”ga murojaat yo‘llagan qashqadaryolik Ilhom Usmonov 4 yildan beri tez tibbiy yordam xizmatida navbatchi haydovchi bo‘lib ishlab kelganligi, joriy yil 16-iyul kuni viloyat Sog‘liqni saqlash boshqarmasiga qarashli maxsus va tez tibbiy yordam avtoxo‘jaligi rahbari Naim Halilov tomonidan nohaq ishdan bo‘shatilgani xususida shikoyat qilmoqda.

Voqea tafsilotlaridan xabardor bo‘lgan “Daryo” muxbirining yozishicha, navbatchi haydovchi Ilhom Usmonovga avtoxo‘jalik ichki mehnat qoidalarini muntazam ravishda buzish aybi qo‘yilgan.

— 16-iyul kuni ishga borsam, menga “putyovka” berishmadi, — deydi Ilhom Usmonov. — Shunda haydovchilarni nazorat qiluvchi kolonna boshlig‘i Anvar Chuitovdan nima sababdan menga “putyovka” yozilmaganligi, o‘rnimga sherigim Hayit Ahmedov yozilganligini so‘radim. “Sen ishdan bo‘shatilding”, dedi. Ishdan bo‘shaganim xususidagi buyruqni so‘radim. Berishmadi. “Buyruq yo‘q bo‘lsa, ishlayman, ‘putyovka’ berasiz”, dedim. “Direktorga kirib ayt” deyishdi. Lekin direktorni topolmadim. Telefon qilsam, “yig‘ilishdaman” deb o‘chirib qo‘ydi.

Ilhom Usmonovning aytishicha, uni ishga qo‘yishmagach, dastlab kasaba uyushma rahbariga kirib vaziyatni bildirgan. Himoyasiga olishlarini so‘ragan. Kasaba uyushmadan ham sado chiqmagach, viloyat Xalq qabulxonasiga murojaat qilgan.

— Viloyat Xalq qabulxonasiga borsam, viloyat hokimligining huquqshunosi bor ekan, — deydi Ilhom Usmonov. — Meni ishga chiqarishmayotganliklarini aytib, shikoyat qildim. Buyruq bo‘lmasa-da, ishlashimga to‘sqinlik qilishayotganliklarini bildirdim. Bir pasdan so‘ng sog‘liqni saqlash boshqarmasi boshlig‘i o‘rinbosari hamda avtoxo‘jalik rahbari Naim Halilov keldi. Hokimlik yuristi ulardan holatga izoh so‘radi. Buyruqni ko‘rsatisholmagach, mening ishga chiqishimga ruxsat berishdi.

“Bor, bugun ishga chiqaver”, dedi Naim Halilov. O‘sha kuni kechki “smena”da ishda bo‘ldim.Ma’lum bo‘lishicha, Ilhom Usmonov tez tibbiy yordam navbatchi shifokori Murodulla Hamidov bilan chaqiruvga chiqqan payt ularning o‘rtasida nizo chiqadi. Haydovchi chaqiruv manzilini so‘raydi, shifokor esa “haydovchi bo‘lsang, manzilni o‘zing topasan” deydi. Xullas, o‘rtadagi nizoga sud aralashadi. Murodulla Hamidovning da’vosi 29-iyul kuni Qarshi shahar Ma’muriy sudi tomonidan ko‘rib chiqilib, haydovchi Ilhom Usmonov foydasiga hukm chiqadi.

Haydovchi Ilhom Usmonov esa sud qarorini avtoxo‘jalik rahbariga yetkazadi. Ammo 29-iyul kuni haydovchi baribir ishdan bo‘shatiladi.

Ushbu ishga doir ma’lumotlarni olish va ikkinchi tomonning fikrini o‘rganish maqsadida viloyat Sog‘liqni saqlash boshqarmasiga qarashli maxsus va tez tibbiy yordam avtoxo‘jaligi rahbari Naim Halilov bilan uchrashdik. Ammo Naim Halilov axborot olishimiz uchun “tepa”dan ruxsat olib kelishimizni, yo‘qsa jurnalistga axborot bermasligini aytdi. Viloyat Sog‘liqni saqlash boshqarmasi boshlig‘i Doniyor Tursunovdan ruxsat oldik. Ammo natija bo‘lmadi. Sog‘liqni saqlash vazirligi matbuot xizmati rahbari Furqat Sanayevga ham chiqib axborot olishda ko‘mak so‘radik. Baribir foydasi yo‘q. Rahbar hech kimga bo‘ysunmadi. “Axborot bermayman” deb turib oldi. Biroz o‘tib viloyat Sog‘liqni saqlash boshqarmasi boshlig‘i Shavkat Amirov kelib, 2-3 kun muddatda haydovchi Ilhom Usmonovning nima sababdan ishdan bo‘shatilganligi haqida batafsil ma’lumot berishlarini aytdi. Qo‘shimcha savollarga ham o‘sha kuni javob olishimiz mumkinligini ma’lum qildi.

Shavkat Amirov tomonidan taqdim etilgan xulosaga ko‘ra, Ilhom Usmonovning ishi viloyat Sog‘liqni saqlash boshqarmasining maxsus ishchi guruhi tomonidan o‘rganib chiqilgan.

Ishchi guruh xulosasidan ma’lum bo‘lishicha, 2019-yil 10-yanvar kuni Respublika shoshilinch tibbiy yordam markazi Qashqadaryo filiali direktori R.Tulyakov avtoxo‘jalik rahbariga tez tibbiy yordam navbatchi shifokori Ilhom Usmonovga nisbatan intizomiy chora ko‘rishni so‘raydi. Filial direktorining ma’lum qilishicha, Ilhom Usmonov mehnat intizomini buzgan, shifokorlarga qo‘pol munosabatda bo‘lgan. Filial shifokori Sh.Salomovaning arizasida yozilishicha, haydovchi uning shaxsiyatiga tegadigan so‘zlar aytib, uni tinch qo‘ymagan. Oilasi tinchligini buzgan. Qolaversa, avtoxo‘jalikning 116 nafar haydovchisi ham Ilhom Usmonovning ishdan bo‘shatilishini so‘rab murojaat qilgan ekan.

Avtoxo‘jalik rahbariyati mazkur murojaatlarni o‘rganib chiqib, 2019-yil 12-fevral kuni Ilhom Usmonovga “hayfsan” beradi. Viloyat Sog‘liqni saqlash boshqarmasi tomonidan taqdim etilgan xulosaga ko‘ra, Ilhom Usmonov bundan xulosa chiqarmaydi. 10-iyul kuni chaqiruvga chiqqan payt navbatchi shifokor Murodulla Hamidov bilan tortishib, manzilni bilmasligini, kimdandir pul kutayotganligini, pulini olsa borishini aytib, chaqiruv kechikishiga sababchi bo‘ladi. Yuqorida tilga olinganidek, Murodulla Hamidov arizasiga ko‘ra mazkur ishni sud ko‘rib chiqadi. Ammo sud Ilhom Usmonov foydasiga hukm chiqaradi.

Shunga qaramasdan avtoxo‘jalik rahbariyati Ilhom Usmonov mehnat intizomini takroran buzganligi bois, uni ishdan bo‘shatishga rozilik so‘rab, avtoxo‘jalik kasaba uyushmasiga taqdimnoma kiritadi. Kasaba uyushmasi rozilik beradi va Ilhom Usmonov ishdan haydaladi. Viloyat Sog‘liqni saqlash boshqarmasi xulosasiga ko‘ra, ushbu holatda Ilhom Usmonovga nisbatan qo‘llangan chora qonuniy.

Ilhom Usmonov “Daryo” muxbiri bilan suhbati davomida tez tibbiy yordam haydovchilariga yaratib berilgan sharoitdan ham nolidi.

— Haydovchilar uchun yaratilgan shart-sharoit ham juda og‘ir ahvolda, — deydi Ilhom Usmonov. — Xonalar juda tor. Shuning uchun karavotlarni ustma-ust qilib joylashtirib, o‘zimizga sharoit hozirlaganmiz. Shifokorlar esa kechki payt karavot bo‘shashini kutib ko‘chada tong ottirishadi.

Ilhom Usmonovning qo‘shimcha qilishicha, avtoxo‘jalik rahbari Hyundai avtomobillari uchun belgilangan yonilg‘ini bermaydi. Ai-91 benzini berilishi kerak bo‘lgan avtomobillarga Ai-80 benzinini quyadi. Shu boisdan ham haydovchilarda yonilg‘i sarfi ko‘payib ketadi. Ortiqcha xarajat haydovchi zimmasiga tushadi.

— Oyligimizdan benzin uchun oyiga 200 ming so‘mgacha ushlab qolishadi, — deydi Ilhom Usmonov. — Nafaqat benzin, hatto avtomobil ehtiyot qismlari uchun ham haydovchilardan pul undirishga harakat qilishadi. Masalan, mendan avtomobil shinasi uchun 200 ming so‘m pul so‘rashgan va olishgan. Bitta avtomobilni 5 nafar haydovchi boshqarishini hisobga olsak, haydovchilardan bir million so‘m pul yig‘ishtirib olgan bo‘lib chiqadi. Pul bermasangiz, avtomobilingiz ballonsiz qoladi.

Sobiq haydovchining iqroriga ko‘ra, avtomobil moyini almashtirish, shina teshilsa yamatish kabi kundalik xarajatlar ham haydovchilar zimmasiga yuklatiladi. Xullas, tizimda muammo ko‘p. Ular bir haydovchi ishdan bo‘shatilgani bilan hal bo‘lib qolmaydi...