Toshkent harbiy okrugidagi “Chirchiq” poligonida O‘zbekiston va Qozog‘iston Mudofaa idoralari hamkorligidagi “Qalqon—2019” maxsus-taktik o‘quvlari boshlandi. Bu haqda Mudofaa vazirligi Axborot va ommaviy kommunikatsiyalar departamenti “Daryo”ga ma’lum qildi.
Tadbirning tantanali ochilish marosimida O‘zbekiston Mudofaa vazirining birinchi o‘rinbosari, Qurolli Kuchlar Bosh shtabi boshlig‘i general-mayor Pavel Ergashev va Qozog‘iston Mudofaa vazirligi mas’ul ofitseri polkovnik Jenisbek Jantasov ishtirok etdi.
Mudofaa idoralari o‘rtasidagi mazkur o‘quvlar do‘stona va o‘zaro ishonchli munosabatlarning mantiqiy davomi hisoblanadi.
Tadbirda so‘zga chiqqanlar hamkorlikdagi mashg‘ulotlar harbiy xizmatchilarning jangovar salohiyati, professional bilimlari, xalqaro terrorizmga qarshi hamkorlikda kurashishdagi mahoratini oshirish, o‘zaro tajriba almashish maqsadida o‘tkazilayotganligini ta’kidladi.
“Qalqon—2019” o‘quvlari davomida harbiy aviatsiya kuchlari, jangovar zirhli texnikalar qo‘llanilishi, desantlashtirish jarayonlari, kunduzgi va tungi sharoitlarda o‘q otish mashqlari kabi qator mashg‘ulotlar o‘tkaziladi.
Xalqaro harbiy hamkorlik doirasidagi maxsus-taktik tadbirlar 14-sentabrga qadar davom etishi rejalashtirilgan.
Izoh (0)