Donald Tramp Eron raketasini uchirishdagi avariya haqida tvit yozib, AQShning maxfiy sun’iy yo‘ldoshini oshkor qilib qo‘ydi

AQSh prezidenti Donald Tramp Eronning Safir SLC harbiy raketasini uchirish vaqtida sodir bo‘lgan avariyaga Amerikaning aloqasi yo‘qligini ma’lum qildi. Bu haqda AQSh prezidentining Twitter’dagi sahifasiga tayanib, TJournal xabar berdi.

Prezident o‘zining tviti ostiga surat joylashtirib, tadqiqotchilar AQShning maxfiy sun’iy yo‘ldoshiga oid ma’lumotlarni aniqlashga sabab bo‘lgan.

Eronning Semnan maydonida Safir SLC raketasining uchirilish vaqtida sodir bo‘lgan fojiali hodisaga AQShning aloqasi yo‘q. Men Eronga muvaffaqiyat va avariyaning sabablarini aniqlashda omad tilayman.

Donald Tramp, AQSh prezidenti 

Joylashtirilgan surat orqali tadqiqotchilar suratga olish burchagi va sun’iy yo‘ldosh turini aniqlay olishgan. Astronom Marko Langbrukning hisob-kitoblariga ko‘ra, suratlar USA 224 razvedka sun’iy yo‘ldoshidan olingan.

Ekspertlar surat Tramp e’lon qilganidan bir kun oldin olinganini taxmin qilishmoqda.

Tadqiqotchilar surat asosida sun’iy yo‘ldoshga qanaqa qurilmalar o‘rnatilganini tahmin qilishga erishdi. Shu kunga qadar USA 224 sun’iy yo‘ldoshining narxi salkam 2 milliard dollardaligidan boshqa deyarli hech narsa ma’lum bo‘lmagan.

Astronom Sis Bassning ta’kidlashicha, suratga olish vaqtida sun’iy yo‘ldosh Eron kosmodromidan 382 kilometr narida bo‘lgan. Shu sabab u xuddi “Xabbl”dagi kabi 2,4 metrli oynali teleskop bilan jihozlangan.

Tadqiqotchilarning fikricha, USA 224 “Yerning eng tiniq surat”larini oladi. Astronomlarning hisob-kitoblariga ko‘ra, sun’iy yo‘ldosh Yer yuzasidagi 10 santimetrli obyektlarni ham aniqlash imkoniga ega. AQSh tijoriy sun’iy yo‘ldoshlari esa faqatgina 30 santimetrli obyektlarni suratga olishi mumkin.