Turkmanistonda sog‘liqni saqlash xodimlari kuni 21-iyuldan ko‘chirildi. Shu kuni prezidentning vafoti haqida xabar tarqagandi

30-avgust kuni Tukmaniston Vazirlar mahkamasining yig‘ilishida bosh vazirning fan, ta’lim, sog‘liqni saqlash va sport masalalari bo‘yicha o‘rinbosari Purli Agamiradov noma’lum sabablarga ko‘ra mamlakat prezidenti Gurbanguli Berdimuhamedovga Sog‘liqni saqlash va tibbiyot sanoati xodimlari kunini 21-iyuldan 10-oktabrga ko‘chirish taklifini bildirdi. Bu haqda “Xronika Turkmenistana” xabar berdi.

Prezident mazkur o‘zgarishni qabul qildi, u keyingi yildan kuchga kiradi.

Turkmaniston tibbiyoti uchun mazkur sananing hech qanday ahamiyatli jihati yo‘q, faqatgina joriy yili 21-iyulda Berdimuhamedov o‘lgani haqida xabarlar tarqalgandi. Shunga qaramay, o‘sha kuni prezident sog‘liqni saqlash xodimlariga tabrik yo‘llagandi. Keyinroq Gurbanguli Berdimuhamedov Germaniyada davolanayotgan onasidan xabar olgani ketgani uchun OAVda ko‘rinmay qolgani haqida xabar paydo bo‘ldi. Boshqa manbalar prezident ikki kun komada bo‘lgani haqida xabar berdi. 24-iyulda 9 kunlik jimlikdan so‘ng Berdimuhamedov omma oldida ko‘rinish berdi. Bir kun o‘tib uning o‘limi haqida mish-mish tarqatganlarni qo‘lga olish boshlandi.

Eslatib o‘tamiz, 2018-yilda Mustaqillik bayramini nishonlash kuni hech qanday rasmiy tushuntirishlarsiz 27-oktabrdan 27-sentabrga ko‘chirilgan edi. 2017-yilning o‘sha kunida Ashxobodda V Yopiq inshootlarda jangovar yakkakurashlar bo‘yicha Osiyo o‘yinlarining yopilish marosimi o‘tkazilgandi.