Дональд Трамп Эрон ракетасини учиришдаги авария ҳақида твит ёзиб, АҚШнинг махфий сунъий йўлдошини ошкор қилиб қўйди

АҚШ президенти Дональд Трамп Эроннинг Safir SLC ҳарбий ракетасини учириш вақтида содир бўлган аварияга Американинг алоқаси йўқлигини маълум қилди. Бу ҳақда АҚШ президентининг Twitter’даги саҳифасига таяниб, TJournal хабар берди.

Президент ўзининг твити остига сурат жойлаштириб, тадқиқотчилар АҚШнинг махфий сунъий йўлдошига оид маълумотларни аниқлашга сабаб бўлган.

Эроннинг Семнан майдонида Safir SLC ракетасининг учирилиш вақтида содир бўлган фожиали ҳодисага АҚШнинг алоқаси йўқ. Мен Эронга муваффақият ва авариянинг сабабларини аниқлашда омад тилайман.

Дональд Трамп, АҚШ президенти 

Жойлаштирилган сурат орқали тадқиқотчилар суратга олиш бурчаги ва сунъий йўлдош турини аниқлай олишган. Астроном Марко Лангбрукнинг ҳисоб-китобларига кўра, суратлар USA 224 разведка сунъий йўлдошидан олинган.

Экспертлар сурат Трамп эълон қилганидан бир кун олдин олинганини тахмин қилишмоқда.

Тадқиқотчилар сурат асосида сунъий йўлдошга қанақа қурилмалар ўрнатилганини таҳмин қилишга эришди. Шу кунга қадар USA 224 сунъий йўлдошининг нархи салкам 2 миллиард доллардалигидан бошқа деярли ҳеч нарса маълум бўлмаган.

Астроном Сис Басснинг таъкидлашича, суратга олиш вақтида сунъий йўлдош Эрон космодромидан 382 километр нарида бўлган. Шу сабаб у худди «Хаббл»даги каби 2,4 метрли ойнали телескоп билан жиҳозланган.

Тадқиқотчиларнинг фикрича, USA 224 «Ернинг энг тиниқ сурат»ларини олади. Астрономларнинг ҳисоб-китобларига кўра, сунъий йўлдош Ер юзасидаги 10 сантиметрли объектларни ҳам аниқлаш имконига эга. АҚШ тижорий сунъий йўлдошлари эса фақатгина 30 сантиметрли объектларни суратга олиши мумкин.