Andijonda avtobusga o‘zboshimchalik bilan maishiy gaz ballonini ulagan haydovchiga chora ko‘rildi

Andijonda texnika xavfsizligi qoidalarini buzgan haydovchi A. Ashurovga chora ko‘rildi, deb xabar bermoqda Transport vazirligi axborot xizmati.

Ma’lum bo‘lishicha, A. Ashurov o‘ziga biriktirilgan “Shahrixon yo‘lovchi Trans” MChJ korxonasiga tegishli Isuzu avtobusida Andijon shahar 1-yo‘nalishda Navoiy shoh ko‘chasi bo‘ylab harakatlanib ketayotgan paytda gaz yoqilg‘isi tugab, o‘chib qolgan.

Shundan so‘ng haydovchi mashinani yoqilg‘i quyish shoxobchasigacha olib borish maqsadida atrofdagi xonadonlarning biriga kirib, maishiy gaz ballonini iltimos qilib olib chiqqan va o‘zboshimchalik bilan avtobusga ulagan.

Gaz ballonini bo‘shatib bo‘lgach, harakatni davom ettirgan. O‘sha paytda avtobusda bo‘lgan yo‘lovchilar tushirib yuborilgan.

Andijon viloyati transport boshqarmasi boshlig‘i shaxsan voqea joyiga chiqib, o‘rganish o‘tkazgan va viloyat YHXB bilan tegishli choralar ko‘rilgan.