Xalqaro nashrlar tomonidan Shvetsiyaning Estersund shahrida 15-avgust kuni terroristik fitnani tashkillashtirish va 2017-yil aprelida Stokgolmda yuz bergan teraktga aloqadorlikda gumonlanib, o‘zbekistonlik deb taxmin qilinayotgan shaxs qo‘lga olingani haqida ma’lumot tarqatilgan edi.
“29-avgust kuni diplomatik vakolatxona Estersund shahri okrug sudidan qo‘lga olingan shaxsning O‘zbekiston fuqarosi emasligi to‘g‘risida rasmiy javob oldi”, — deya xabar bermoqda O‘zbekiston Tashqi ishlar vazirligi. Gumonlanuvchi aynan qaysi mamlakat fuqarosi ekaniga TIV aniqlik kiritmagan.
Eslatib o‘tamiz, 2017-yil 7-aprel kuni asli o‘zbekistonlik Rahmat Oqilov olib qochilgan yuk mashinasini Stokgolm markazidagi Drottninggatan piyodalar ko‘chasi bo‘ylab haydab, ko‘plab odamlarni urib-bosib ketgan edi.
Terakt deb baholangan hodisa oqibatida besh kishi halok bo‘lgan, o‘n kishi jarohatlangan edi. Oqilov birinchi sud so‘rog‘idayoq bu ishni IShID terrorchilik tashkilotini qo‘llab-quvvatlash maqsadida qilganini tan olgan edi.
Rahmat Oqilov mazkur qilmishi uchun Shvetsiya sudi tomonidan 2018-yil iyunida umrbod ozodlikdan mahrum etilgan edi. U jazoni Shvetsiyaning eng qattiq tartibli qamoqxonasida o‘tamoqda.
Izoh (0)