Андижонда автобусга ўзбошимчалик билан маиший газ баллонини улаган ҳайдовчига чора кўрилди

Андижонда техника хавфсизлиги қоидаларини бузган ҳайдовчи А. Ашуровга чора кўрилди, деб хабар бермоқда Транспорт вазирлиги ахборот хизмати.

Маълум бўлишича, А. Ашуров ўзига бириктирилган «Шаҳрихон йўловчи Транс» МЧЖ корхонасига тегишли Isuzu автобусида Андижон шаҳар 1-йўналишда Навоий шоҳ кўчаси бўйлаб ҳаракатланиб кетаётган пайтда газ ёқилғиси тугаб, ўчиб қолган.

Шундан сўнг ҳайдовчи машинани ёқилғи қуйиш шохобчасигача олиб бориш мақсадида атрофдаги хонадонларнинг бирига кириб, маиший газ баллонини илтимос қилиб олиб чиққан ва ўзбошимчалик билан автобусга улаган.

Газ баллонини бўшатиб бўлгач, ҳаракатни давом эттирган. Ўша пайтда автобусда бўлган йўловчилар тушириб юборилган.

Андижон вилояти транспорт бошқармаси бошлиғи шахсан воқеа жойига чиқиб, ўрганиш ўтказган ва вилоят ЙҲХБ билан тегишли чоралар кўрилган.