Oliy Majlis Qonunchilik palatasining navbatdagi majlisida deputatlar mamlakat ijtimoiy-siyosiy, sotsial-iqtisodiy hayotining turli sohalarida amalga oshirilayotgan islohotlarni huquqiy jihatdan ta’minlashga qaratilgan bir qator qonun loyihalarini muhokama qildi.
Deputatlar ishni “O‘zbekiston Respublikasining ayrim qonun hujjatlariga o‘zgartish va qo‘shimchalar kiritish to‘g‘risida”gi qonun loyihasini ikkinchi o‘qishda ko‘rib chiqishdan boshladi. Mazkur qonun loyihasi bilan Prezident huzuridagi Tadbirkorlik subyektlarining huquqlari va qonuniy manfaatlarini himoya qilish bo‘yicha vakilning vakolatlari kengaytirilmoqda. Xususan, vakilning fuqarolik, iqtisodiy va ma’muriy sudlarning qonuniy kuchga kirgan hujjatlari ustidan kassatsiya va nazorat tartibida shikoyat qilish huquqi belgilab berilyapti.
Shundan so‘ng parlament a’zolari “O‘zbekiston Respublikasining Ma’muriy javobgarlik to‘g‘risidagi kodeksiga o‘zgartish va qo‘shimchalar kiritish to‘g‘risida”gi qonuni loyihasini ikkinchi o‘qishda muhokama qildi. Qayd etilganidek, mazkur loyihani birinchi o‘qishda ko‘rib chiqish davomida bahs-munozaralarga sabab bo‘lgan barcha moddalarini maromiga yetkazish maqsadida deputatlar ishchi guruh va ekspertlar ishtirokida muhokama qilib, pishiq-puxta holga keltirdi. Havolaki normalar chiqarilib, ular o‘rniga to‘g‘ridan-to‘g‘ri ishlaydigan moddalar kiritildi.
Qonun loyihasida sud tomonidan ma’muriy jarimaga tortish holatlaridan tashqari, jarimaga tortish to‘g‘risidagi qaror topshirilgan sanadan boshlab 15 kun ichida jarima miqdorining 70 foizi huquqbuzar tomonidan ixtiyoriy ravishda to‘langan taqdirda u qolgan summani to‘lashdan ozod etilishini nazarda tutuvchi ma’muriy jarimaga tortish to‘g‘risidagi qarorlarni ijro etishning soddalashtirilgan tartibini joriy etish nazarda tutildi.
Deputatlarning qayd etishicha, taklif qilinayotgan o‘zgartirishlarning amaliyotda qo‘llanishi fuqarolarni tayinlangan jarimalarni o‘z vaqtida to‘lashga rag‘batlantiradi, ular uchun qo‘shimcha qulayliklar yaratadi, shuningdek, mablag‘lar o‘z vaqtida davlat budjetiga kelib tushishini ta’minlaydi.
Majlisda “O‘zbekiston Respublikasi Vazirlar Mahkamasi to‘g‘risida”gi O‘zbekiston Respublikasi Qonuniga o‘zgartish va qo‘shimchalar kiritish haqida”gi qonun loyihasi birinchi o‘qishda muhokama qilindi. Ta’kidlanganidek, amaldagi qonun hukumat faoliyati bilan bog‘liq munosabatlarni to‘liq qamrab olmagan, Vazirlar Mahkamasi a’zolarining o‘ziga biriktirilgan aniq soha va tarmoqlar uchun javobgarligi hamda ularni baholash mezonlari tartibga solinmagan.
Mazkur qonun loyihasining qabul qilinishi esa Vazirlar Mahkamasi faoliyatini tartibga soladigan qonun hujjatlaridagi mavjud bo‘shliqlarni bartaraf etadi. Hukumatning tarmoq va sohalardagi vakolatlari aniq belgilab berilgan holda, uning ushbu sohalarni rivojlantirish bo‘yicha javobgarligi kuchaytiriladi. Turli darajadagi qonun hujjatlari to‘g‘ridan-to‘g‘ri amal qiladigan yagona qonunda mujassamlashadi.
Majlisda uy-joy mulkdorlari shirkatlarining huquqiy maqomini belgilash, ko‘p kvartirali uylar masalalaridagi davlat boshqaruvi va nazorati organlarining munosabatlarini tartibga solish maqsadida ishlab chiqilgan “Ko‘p kvartirali uylarni boshqarish to‘g‘risida”gi qonun loyihasining ikkinchi o‘qishdagi muhokamasi ham qizg‘in bahs-munozaralarga boy kechdi.
Mazkur qonun loyihasini maromiga yetkazish jarayonida deputatlar tomonidan qator normalarning amaliyotda ishlashini o‘rganish bo‘yicha barcha hududlarda soha vakillari, shirkat rahbarlari va a’zolari, boshqaruv kompaniyalari xodimlari bilan uchrashuvlar o‘tkazildi. Mavjud holatlar o‘rganildi, tegishli takliflar olindi. Ana shu takliflar asosida yanada takomillashtirilgan qonun loyihasi bilan ko‘p kvartirali uylarni boshqarish usullariga aniqlik kiritildi.
Deputatlarning fikricha, qonun loyihasining qabul qilinishi sohada uchrayotgan ko‘plab muammolarni bartaraf etishga, amaliyotda vujudga kelgan yana bir o‘tkir masala — noturar joy mulkdorlarining shirkat a’zosi hisoblanmasligiga barham beriladi, ularning huquq va majburiyatlari kengaytiriladi.
Izoh (0)