Bosh vazirning Qashqadaryo viloyatidagi qabulxonasi mas’ullari tomonidan hududlarga yurib aniqlangan 1011 ta muammoning 825 tasi tumanda, 186 tasi esa viloyatning o‘zida yechilishi mumkin bo‘lgan muammolar ekanligi ma’lum bo‘ldi. Bu haqda “Daryo”ga Bosh vazirning viloyatdagi qabulxonasi mudiri Murod Eshnazarov ma’lum qilmoqda.
Ma’lum bo‘lishicha, tadbirkorlarni qiynayotgan muammolarni o‘rganish maqsadida Bosh vazir qabulxonasi mudiri Murod Eshnazarov hamda viloyat hokimi o‘rinbosari Xurram Jo‘rayev ishtirokida tuman va shaharlarda tadbirkorlar bilan muloqotlar tashkil etilgan. Viloyatdagi mavjud mahallalarning 331 tasida hudud tadbirkorlari bilan bo‘lgan muloqotda 1011 ta muammo aniqlanib, ularning yechimi haqida bosh qotirilgan. Aniqlangan muammolarning 612 tasi joyida mas’ul tashkilot rahbarlari ishtirokida o‘z yechimini topgan bo‘lsa, qolgan 399 ta muammo belgilangan tartibda ko‘rib chiqish uchun mas’ul tashkilotlarga yuborilib, Bosh vazir qabulxonasi tomonidan nazoratga olingan.
Shuningdek, Bosh vazir qabulxonasiga iyun—iyul oylari davomida tadbirkorlardan 300 ta murojaat ham kelib tushgan bo‘lib, unda tadbirkorlar o‘zlarini qiynayotgan masalalar haqida shikoyat qilgan. Ayni kunga qadar 300 ta muammoning 211 tasi o‘z yechimini topgan.
Izoh (0)