Ayni paytda O‘zbekiston Oliy Majlisi Senati raisi Tanzila Norboyeva boshchiligidagi delegatsiya ayni kunlarda Koreya Milliy Assambleyasi Spikerining taklifiga binoan rasmiy tashrif bilan Koreya respublikasida bo‘lib turibdi. Bu haqda jurnalist Jonibek Ma’rupov “Daryo”ga ma’lum qildi.
O‘zbekiston parlamenti delegatsiyasi Koreyaga tashrifining birinchi kuni samarali uchrashuvlarga boy bo‘ldi.
Bugun, 6-avgust kuni Koreya respublikasida O‘zbekiston Oliy Majlisi Senati raisi Tanzila Norboyeva O‘zbekiston delegatsiyasining Yashil o‘sish global instituti prezidenti Pan Gi Mun bilan uchrashdi. Ushrashuvda ekologiya va iqlim masalalari bo‘yicha O‘zbekiston va Koreya hamkorligini muvofiqlashtirish, O‘zbekiston Prezidentining Orol dengizi bilan bog‘liq dolzarb muammolarni hal etishga qaratilgan tashabbuslarini targ‘ib qilishni davom ettirish imkoniyatlari muhokama etildi.
Bunda asosiy e’tibor Yashil o‘sish global instituti ko‘rib chiqishi uchun topshirilgan loyihalarni amalga oshirishni boshlash maqsadida O‘zbekistonning keyingi rejalariga, shuningdek, mazkur institutning O‘zbekistondagi vakolatxonasini ochish imkoniyatlariga qaratildi.
Qayd etilishicha, institut vakillarining O‘zbekistonda bevosita bo‘lishi ekologik sof texnologiyalar ishlab chiqish va joriy qilish, “yashil” iqtisodiyot prinsiplarini, ekologik toza, energiya va suv tejaydigan texnologiyalarni kompleks joriy etish, cho‘llanish va ekologik migratsiyaning oldini olish, shuningdek, Markaziy Osiyoda iqlim o‘zgarishiga moslashish va uning oqibatlarini yumshatish maqsadida Yashil iqlim jamg‘armasining, shuningdek, boshqa jamg‘armalarning moliyaviy mablag‘larini jalb qilish bo‘yicha GGGI institutsional imkoniyatlarini oshiradi.
Shuningdek, O‘zbekiston Oliy Majlisi Senati raisi Tanzila Norboyeva Pan Gi Munni va uning jamoasini joriy yil 25-oktabr kuni O‘zbekistonda o‘tkaziladigan Orolbo‘yini ekologik innovatsiyalar va texnologiyalar zonasi, deb e’lon qilish bo‘yicha BMT rahnamoligidagi yuqori darajadagi xalqaro konferensiyada ishtirok etishga taklif qildi.
Izoh (0)