Anqarada 5-avgust kuni O‘zbekiston Tashqi ishlar vaziri Abdulaziz Komilov Turkiya elchilarining 11 yillik konferensiyasida faxriy mehmon sifatida ishtirok etdi va nutq so‘zladi. Bu haqda TIV matbuot xizmati xabar berdi.
Turkiya elchilarining yillik konferensiyalari 2008-yildan beri Turkiya respublikasining barcha favqulodda va muxtor elchilari ishtirokida o‘tkazilib kelinadi. Ushbu tadbir mamlakatning siyosiy va diplomatik faoliyatini takomillashtirish, xalqaro hamkorlikni ichki va idoralararo muvofiqlashtirishni kuchaytirish va serqirra tashqi siyosat yuritishda muhim rol o‘ynaydi.
Bu yilgi konferensiyaga Ukraina prezidenti Vladimir Zelenskiy, Iordaniya tashqi ishlar vaziri Ayman Safadi, BMTning Livandagi maxsus koordinatori Yan Kubish, BMT Bosh kotibining Liviya bo‘yicha maxsus vakili Gassan Salame va boshqa yuqori mansabdor shaxslar ham taklif etilgan.
O‘zbekiston TIV rahbari ta’kidlaganidek, 2017 va 2018-yillarda Prezident Shavkat Mirziyoyevning Turkiyaga va Turkiya prezidenti Rajab Toyyib Erdo‘g‘onning O‘zbekistonga tashrifi bugun strategik sheriklik darajasiga ko‘tarilgan munosabatlar tarixida yangi sahifa ochdi.
Abdulaziz Komilov o‘z nutqida jahon va Markaziy Osiyo mintaqasidagi vaziyatning holati va rivojlanish istiqbollari bo‘yicha O‘zbekiston qarashlari to‘g‘risida so‘zlab berdi, mintaqaviy va global tahdidlarga to‘xtalgan, O‘zbekiston Prezidentining keng makromintaqada tinchlik va barqaror rivojlanishni ta’minlashga qaratilgan tashqi siyosiy tashabbuslarini izohlagan.
Izoh (0)