Fransiya chempionatini diqqat bilan kuzatib bormaydigan inson Nikolya Pepe kimligini bilishi va yil davomida grand klublar uning uchun 80 million yevro taklif qilganini tushunishi juda qiyin, albatta. Undan ham kutilmagani, Yevropa Chempionlar Ligasi yo‘llanmasidan quruq qolgan va tejamkorlikka e’tibor qaratishi kutilgan “Arsenal” shuncha pul sarfladi.
Endi esa Unai Emeri bir xarid bilan jamoa hujum chizig‘ini Angliya Premyer ligasidagi eng kuchlilaridan biriga aylantirishi mumkin. Ishonmaysizmi? Keling, Nikolya bilan yaqindan tanishib olamiz:
Nikolya Pepe kim o‘zi?
U butun Fransiya chempionati, shu jumladan PSJni ham yanchib tashlagan futbolchi. Pepe – bir mavsumlik o‘yinchi emas, u avval ham yaxshi o‘yin ko‘rsatgan. U deyarli mukammal darajadagi hujumkor futbochi bo‘lgan. Pepe o‘tgan mavsum 41 ta o‘yinda ishtirok etib, 36 ta golda qatnashdi (22+14) va to‘purarlar poygasida faqat Kilian Mbappedan ortda qoldi. Qizig‘i, PSJ ham Pepega da’vogarlardan biri edi va vinger hammasidan ko‘proq Parijga ketishni maqsad qilgandi. Biroq arab shayxlari uchun ham uning narxi qimmatlik qildi.
Ma’lum shart bilan “Lill” futbolchisiga Fransiya chempionatining o‘tgan mavsumdagi eng yaxshi o‘yinchisi maqomini berish mumkin. Uning harakatlari hayron qoldirmay qo‘ymaydi. Raqibning ikki-uch futbolchisini aldab o‘tish Pepe uchun muammo emas (har bir o‘yinda o‘rtacha 2,7 dribling – Liga 1 dagi beshinchi ko‘rsatkich).
U ikki-uchta uzatma bilan darvozabon bilan yuzma-yuz kelishi va vaziyat taqdirini hal qilish imkoniyatiga ega. Fransiyalik ekspertlarning fikricha, Eden Azar davridan buyon “Lill”da bu darajadagi kuchli futbolchi bo‘lmagan.
Nikolyaning sevimli ishi – markaz tomon harakatlanish. U “Liverpul”dagi Sadio Manega juda o‘xshab ketadi. Faqat boshqa qanotda to‘p suradi. U “Arsenal”da Lyakazett—Obameyang duetini to‘ldiradi. Salohiyatlarni hisoblab chiqqanda bu uchlik hozirda Yurgen Klopp qo‘l ostidagi “trio”ga juda o‘xshab ketadi.
Umuman olganda, “Arsenal” o‘z safiga mukammal zamonaviy vingerni qo‘shib oldi. U hujumda ham, himoyadagi pressingda ham juda yaxshi harakat qiladi.
Futbolchining tarjimayi holi haqidaYoshligida Pepe hech qachon katta iqtidor sifatida e’tirof etilmagan. Uning futboldagi yo‘li Fransiyaning 5-divizioni vakili “Puate” klubida boshlangan. 2013-yilda u “Anje” tizimiga o‘tgan. Albatta, avvaliga uchta liga yuqorida to‘p suruvchi jamoaga moslashib ketish oson kechmadi. Dastlab Nikolya to‘rtinchi divizionda harakat qiladigan “Anje”ning ikkinchi jamoasida harakat qildi, Liga 2 o‘yinlarida esa ora-orada zaxiradan maydonga tushib turardi.
Uning faoliyatida 2015/16-yilgi mavsum muhim rol o‘ynadi, o‘sha mavsum ivuarlik futbolchi uchinchi liga vakili “Orlean”da ijara asosida to‘p surdi. Pepe yuqori ligaga yo‘l olgan jamoaning haqiqiy yetakchisiga aylandi. Bunga parallel ravishda “Anje” ham oliy ligaga yo‘l olgan va Liga 1 da debyut qilish imkoniyatiga ega bo‘lgandi.
“Lill” 2017-yilning yozida hujumchini 10 million yevro evaziga sotib oldi. Oliy divizionning 33 ta o‘yinida 3 ta gol va 1 ta golli uzatmaga muallif bo‘lgan futbolchi uchun 10 million to‘layotganda klub nimani o‘ylagan edi? O‘sha payti bu savolni juda ko‘pchilik bergandi. Bir yarim yildan so‘ng uning narxi kamida to‘rt barobarga oshib ketishini o‘sha payt kim ham o‘ylabdi...Avvaliga yangi klubida Pepega oson bo‘lgani yo‘q. Marselo Belsa negadir uni markaziy hujumda o‘ynatdi, Pepe esa noyabrga qadar gol ura olmadi. Barchasi “Lill” boshqaruviga Kristof Galte kelganidan keyin o‘zgardi.
“Sent-Etyenn” sobiq ustozi Pepeni o‘ng qanotga qaytardi, afrikalik futbolchi esa unga ajoyib harakatlari bilan minnatdorchilik bildirdi. “Lill” Liga 1 ni tark etish arafasida turgandi, biroq Pepe tomonidan amalga oshirilgan 13 ta gol va 5 ta samarali uzatma jamoani qutqarib qoldi. Endi bu yigit “Lill”ni Yevropa Chempionlar Ligasiga olib chiqdi.
Pepega nima yetishmaydi?
Tabiatan Pepe juda iqtidorli. Ammo u kuchli liga va musobaqalarda ishtirok etmagan. Shu sabab, u ba’zida keraksiz paytda darvoza tomon zarba beradi, ba’zida esa noo‘rin vaziyatda driblingga kirishadi. Qo‘shimchasiga, Nikolya jamoaviy o‘yinchi emas: gohida u sheriklariga umuman e’tibor bermaydi va yakka o‘zi raqib bilan kurashga kirishadi.
Buning oqibati o‘laroq, Pepe Fransiya chempionatida to‘pni yo‘qotish bo‘yicha yetakchi hisoblanadi. (har bir o‘yinda o‘rtacha 2,9 marta). Biroq shu bilan birga, unga nisbatan Neymar va Mbappega qaraganda ko‘proq qo‘pollik ishlatiladi.
Angliyaga moslashish uchun Pepega vaqt kerak bo‘ladi. Obameyang ham Fransiya chempionatida o‘ynagan, biroq keyin Bundesligada tajriba orttirgan. Lyakazett esa Chempionlar Ligasida yetarli ko‘nikmani olgan. Pepe o‘z kamchiliklarini tezda yo‘qotishi kerak. Qiyin tomoni Nikolya bu ishni o‘zi uchun odatiy bo‘lmagan sharoitda amalga oshirishi kerak.
Bu “Arsenal” uchun yaxshi xaridmi?
Bir qaraganda – ha. Amaliyotda Pepeda yetarli kamchiliklar bor. Bu yerda ikkita variant bor: u bora-bora yorqin o‘yin namoyish qiladi yoki bir-ikki yildan keyin boshini quyi solgan holda “Arsenal”ni tark etadi. Bunday hodisa Jervinyo bilan bo‘lgandi. U ham “Lill” klubidan kelgan ivuarlik futbolchi edi.
“Arsenal” Pepe uchun talab qilingan pulni to‘rt yil mobaynida to‘lab beradi. Shunday ekan, londonliklar qo‘rqmasdan yana bir-ikki nafar futbolchi bilan o‘z saflarini kuchaytirib olishlari mumkin bo‘ladi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @daryo_sport’ga obuna bo‘ling!
Izoh (0)