«Арсенал» 80 млн еврога сотиб олган Николя Пепе ҳақида

Франция чемпионатини диққат билан кузатиб бормайдиган инсон Николя Пепе кимлигини билиши ва йил давомида гранд клублар унинг учун 80 миллион евро таклиф қилганини тушуниши жуда қийин, албатта. Ундан ҳам кутилмагани, Европа Чемпионлар Лигаси йўлланмасидан қуруқ қолган ва тежамкорликка эътибор қаратиши кутилган «Арсенал» шунча пул сарфлади.

Энди эса Унаи Эмери бир харид билан жамоа ҳужум чизиғини Англия Премьер лигасидаги энг кучлиларидан бирига айлантириши мумкин. Ишонмайсизми? Келинг, Николя билан яқиндан танишиб оламиз:

Николя Пепе ким ўзи?

У бутун Франция чемпионати, шу жумладан ПСЖни ҳам янчиб ташлаган футболчи. Пепе – бир мавсумлик ўйинчи эмас, у аввал ҳам яхши ўйин кўрсатган. У деярли мукаммал даражадаги ҳужумкор футбочи бўлган. Пепе ўтган мавсум 41 та ўйинда иштирок этиб, 36 та голда қатнашди (22+14) ва тўпурарлар пойгасида фақат Килиан Мбаппедан ортда қолди. Қизиғи, ПСЖ ҳам Пепега даъвогарлардан бири эди ва вингер ҳаммасидан кўпроқ Парижга кетишни мақсад қилганди. Бироқ араб шайхлари учун ҳам унинг нархи қимматлик қилди.

Маълум шарт билан «Лилль» футболчисига Франция чемпионатининг ўтган мавсумдаги энг яхши ўйинчиси мақомини бериш мумкин. Унинг ҳаракатлари ҳайрон қолдирмай қўймайди. Рақибнинг икки-уч футболчисини алдаб ўтиш Пепе учун муаммо эмас (ҳар бир ўйинда ўртача 2,7 дриблинг – Лига 1 даги бешинчи кўрсаткич).

У икки-учта узатма билан дарвозабон билан юзма-юз келиши ва вазият тақдирини ҳал қилиш имкониятига эга. Франциялик экспертларнинг фикрича, Эден Азар давридан буён «Лилль»да бу даражадаги кучли футболчи бўлмаган.

Николянинг севимли иши – марказ томон ҳаракатланиш. У «Ливерпуль»даги Садио Манега жуда ўхшаб кетади. Фақат бошқа қанотда тўп суради. У «Арсенал»да Ляказетт—Обамеянг дуэтини тўлдиради. Салоҳиятларни ҳисоблаб чиққанда бу учлик ҳозирда Юрген Клопп қўл остидаги «трио»га жуда ўхшаб кетади.

Умуман олганда, «Арсенал» ўз сафига мукаммал замонавий вингерни қўшиб олди. У ҳужумда ҳам, ҳимоядаги прессингда ҳам жуда яхши ҳаракат қилади.

Футболчининг таржимаи ҳоли ҳақидаЁшлигида Пепе ҳеч қачон катта иқтидор сифатида эътироф этилмаган. Унинг футболдаги йўли Франциянинг 5-дивизиони вакили «Пуате» клубида бошланган. 2013 йилда у «Анже» тизимига ўтган. Албатта, аввалига учта лига юқорида тўп сурувчи жамоага мослашиб кетиш осон кечмади. Дастлаб Николя тўртинчи дивизионда ҳаракат қиладиган «Анже»нинг иккинчи жамоасида ҳаракат қилди, Лига 2 ўйинларида эса ора-орада захирадан майдонга тушиб турарди.

Унинг фаолиятида 2015/16 йилги мавсум муҳим рол ўйнади, ўша мавсум ивуарлик футболчи учинчи лига вакили «Орлеан»да ижара асосида тўп сурди. Пепе юқори лигага йўл олган жамоанинг ҳақиқий етакчисига айланди. Бунга параллел равишда «Анже» ҳам олий лигага йўл олган ва Лига 1 да дебют қилиш имкониятига эга бўлганди.

«Лилль» 2017 йилнинг ёзида ҳужумчини 10 миллион евро эвазига сотиб олди. Олий дивизионнинг 33 та ўйинида 3 та гол ва 1 та голли узатмага муаллиф бўлган футболчи учун 10 миллион тўлаётганда клуб нимани ўйлаган эди? Ўша пайти бу саволни жуда кўпчилик берганди. Бир ярим йилдан сўнг унинг нархи камида тўрт баробарга ошиб кетишини ўша пайт ким ҳам ўйлабди...Аввалига янги клубида Пепега осон бўлгани йўқ. Марсело Бельса негадир уни марказий ҳужумда ўйнатди, Пепе эса ноябрга қадар гол ура олмади. Барчаси «Лилль» бошқарувига Кристоф Гальтье келганидан кейин ўзгарди.

«Сент-Этьенн» собиқ устози Пепени ўнг қанотга қайтарди, африкалик футболчи эса унга ажойиб ҳаракатлари билан миннатдорчилик билдирди. «Лилль» Лига 1 ни тарк этиш арафасида турганди, бироқ Пепе томонидан амалга оширилган 13 та гол ва 5 та самарали узатма жамоани қутқариб қолди. Энди бу йигит «Лилль»ни Европа Чемпионлар Лигасига олиб чиқди.

Пепега нима етишмайди?

Табиатан Пепе жуда иқтидорли. Аммо у кучли лига ва мусобақаларда иштирок этмаган. Шу сабаб, у баъзида кераксиз пайтда дарвоза томон зарба беради, баъзида эса ноўрин вазиятда дриблингга киришади. Қўшимчасига, Николя жамоавий ўйинчи эмас: гоҳида у шерикларига умуман эътибор бермайди ва якка ўзи рақиб билан курашга киришади.

Бунинг оқибати ўлароқ, Пепе Франция чемпионатида тўпни йўқотиш бўйича етакчи ҳисобланади. (ҳар бир ўйинда ўртача 2,9 марта). Бироқ шу билан бирга, унга нисбатан Неймар ва Мбаппега қараганда кўпроқ қўполлик ишлатилади.

Англияга мослашиш учун Пепега вақт керак бўлади. Обамеянг ҳам Франция чемпионатида ўйнаган, бироқ кейин Бундеслигада тажриба орттирган. Ляказетт эса Чемпионлар Лигасида етарли кўникмани олган. Пепе ўз камчиликларини тезда йўқотиши керак. Қийин томони Николя бу ишни ўзи учун одатий бўлмаган шароитда амалга ошириши керак.

Бу «Арсенал» учун яхши харидми?

Бир қараганда – ҳа. Амалиётда Пепеда етарли камчиликлар бор. Бу ерда иккита вариант бор: у бора-бора ёрқин ўйин намойиш қилади ёки бир-икки йилдан кейин бошини қуйи солган ҳолда «Арсенал»ни тарк этади. Бундай ҳодиса Жервиньо билан бўлганди. У ҳам «Лилль» клубидан келган ивуарлик футболчи эди.

«Арсенал» Пепе учун талаб қилинган пулни тўрт йил мобайнида тўлаб беради. Шундай экан, лондонликлар қўрқмасдан яна бир-икки нафар футболчи билан ўз сафларини кучайтириб олишлари мумкин бўлади.