Joriy yilgi imtihonlarda Qashqadaryoda abituriyentlar va ularning ota-onalari, yaqinlari uchun qanday shart-sharoit hozirlanganligini bilish maqsadida “Daryo” muxbiri Otabek Qo‘ldoshev Qarshi olimpiya zahiralari kolleji va Qarshi muhandislik iqtisodiyot institutida bo‘ldi.
Joriy yil Qashqadaryoda 111 833 nafar abituriyent talaba bo‘lish ishtiyoqida oliygohga hujjat topshirgan. Shundan Qarshi davlat universitetiga 49 368 nafar, Qarshi muhandislik-iqtisodiyot institutiga 24 206 nafar, TATU Qarshi filialiga 4 808 nafar, Toshkent irrigatsiya va qishloq xo‘jaligini mexanizatsiyalash muhandislari institutining Qarshi filialiga 3 223 nafar, Nizomiy nomidagi pedagogika universiteti Shahrisabz filialiga 5 625 nafar, Kimyo-texnologiyalari instituti Shahrisabz filialiga 2 242 nafar abituriyent hujjat topshirgan bo‘lsa, boshqa oliy ta’lim muassasalariga kirish ishtiyoqini bildirgan qashqadaryolik abituriyentlar 22 361 nafarni tashkil qiladi. Bu haqda viloyatda davlat imtihonlarining o‘tkazilishiga ma’sul qilib belgilangan viloyat hokimi o‘rinbosari Dolli Allayev ma’lum qildi.
Qashqadaryoda bo‘lib o‘tayotgan joriy yilgi imtihonlarda abituriyentlarning ota-onalari va yaqinlari uchun alohida sharoitlar hozirlangan. 4800 kishiga mo‘ljallangan kutish joyida katta monitor o‘rnatilgan bo‘lib, monitorda abituriyentlarning imtihon topshirish jarayonlari kuzatib boriladi. Imtihon jarayonlari bo‘lib o‘tayotgan 5 ta o‘quv binosiga o‘rnatilgan kameralar ota-onalarga farzandini kuzatib turish imkoniyatini bermoqda.
Undan sal narida esa, kutishdan zerikkan ota-onalar uchun konsert namoyish etilmoqda. Ma’lum bo‘lishicha, konsert kunning birinchi yarmida soat 8:00 dan 11:00 gacha o‘tkazilsa, kunning ikkinchi yarmidagi tomoshalar soat 15:00 dan 18:00 ga qadar davom etadi. Quvonarlisi, konsertda viloyatning ko‘zga ko‘ringan san’atkorlari bilan birgalikda, baxshilar ham ishtirok etib, xalq ko‘nglini ovlayapti.
“Nasib etsa 6 avgustdan e’tiboran viloyat musiqali drama teatri aktyorlari ishtiroki ham rejalashtirilgan bo‘lib, teatr jamoasining qisqa va mazmunli sahna asarlari namoyishi kutilyapti”, — deydi imtihon jarayonlarini tashkillashtirishga mas’ul qilib belgilangan viloyat hokimligi xodimi No‘mon Rayimqulov. — “Buning barchasi ota-onalar va abituriyentlarning yaqinlari uchun”.
E’tiborli jihati, shu yerning o‘zida ko‘chma kutubxona ham tashkil etilgan bo‘lib, mutolaa xohlovchilar uchun sharoit hozirlangan.
No‘mon Raimqulovning aytishicha, abituriyentlar yaqinlarining bo‘sh vaqtini unumli o‘tkazish maqsadida hududda stol tennisi, shaxmat-shashka doskalari o‘rnatilgan. Bundan ko‘zlangan maqsad abituriyentlar yaqinlari vaqtini mazmunli o‘tkazish.
Izoh (0)