Жорий йилги имтиҳонларда Қашқадарёда абитуриентлар ва уларнинг ота-оналари, яқинлари учун қандай шарт-шароит ҳозирланганлигини билиш мақсадида «Дарё» мухбири Отабек Қўлдошев Қарши олимпия заҳиралари коллежи ва Қарши муҳандислик иқтисодиёт институтида бўлди.
Жорий йил Қашқадарёда 111 833 нафар абитуриент талаба бўлиш иштиёқида олийгоҳга ҳужжат топширган. Шундан Қарши давлат университетига 49 368 нафар, Қарши муҳандислик-иқтисодиёт институтига 24 206 нафар, ТАТУ Қарши филиалига 4 808 нафар, Тошкент ирригация ва қишлоқ хўжалигини механизациялаш муҳандислари институтининг Қарши филиалига 3 223 нафар, Низомий номидаги педагогика университети Шаҳрисабз филиалига 5 625 нафар, Кимё-технологиялари институти Шаҳрисабз филиалига 2 242 нафар абитуриент ҳужжат топширган бўлса, бошқа олий таълим муассасаларига кириш иштиёқини билдирган қашқадарёлик абитуриентлар 22 361 нафарни ташкил қилади. Бу ҳақда вилоятда давлат имтиҳонларининг ўтказилишига маъсул қилиб белгиланган вилоят ҳокими ўринбосари Долли Аллаев маълум қилди.
Қашқадарёда бўлиб ўтаётган жорий йилги имтиҳонларда абитуриентларнинг ота-оналари ва яқинлари учун алоҳида шароитлар ҳозирланган. 4800 кишига мўлжалланган кутиш жойида катта монитор ўрнатилган бўлиб, мониторда абитуриентларнинг имтиҳон топшириш жараёнлари кузатиб борилади. Имтиҳон жараёнлари бўлиб ўтаётган 5 та ўқув биносига ўрнатилган камералар ота-оналарга фарзандини кузатиб туриш имкониятини бермоқда.
Ундан сал нарида эса, кутишдан зериккан ота-оналар учун концерт намойиш этилмоқда. Маълум бўлишича, концерт куннинг биринчи ярмида соат 8:00 дан 11:00 гача ўтказилса, куннинг иккинчи ярмидаги томошалар соат 15:00 дан 18:00 га қадар давом этади. Қувонарлиси, концертда вилоятнинг кўзга кўринган санъаткорлари билан биргаликда, бахшилар ҳам иштирок этиб, халқ кўнглини овлаяпти.
«Насиб этса 6 августдан эътиборан вилоят мусиқали драма театри актёрлари иштироки ҳам режалаштирилган бўлиб, театр жамоасининг қисқа ва мазмунли саҳна асарлари намойиши кутиляпти», — дейди имтиҳон жараёнларини ташкиллаштиришга масъул қилиб белгиланган вилоят ҳокимлиги ходими Нўмон Райимқулов. — «Бунинг барчаси ота-оналар ва абитуриентларнинг яқинлари учун».
Эътиборли жиҳати, шу ернинг ўзида кўчма кутубхона ҳам ташкил этилган бўлиб, мутолаа хоҳловчилар учун шароит ҳозирланган.
Нўмон Раимқуловнинг айтишича, абитуриентлар яқинларининг бўш вақтини унумли ўтказиш мақсадида ҳудудда стол тенниси, шахмат-шашка доскалари ўрнатилган. Бундан кўзланган мақсад абитуриентлар яқинлари вақтини мазмунли ўтказиш.
Изоҳ (0)