Farg‘ona shahrida Janubiy Koreya bilan hamkorlikda yangi universitet ochiladi. U Farg‘ona shahridagi Koreya Xalqaro universiteti – Korea International University in Ferghana (KIUF) deb nomlanadi. Bu haqda “Daryo” muxbiri xabar bermoqda.
Universitet 2019–2020 o‘quv yilidan o‘z faoliyatini boshlaydi. Unda 16 ta fakultet ochilishi rejalashtirilgan. Dastlab ta’lim o‘zbek va koreys tillarida olib boriladi. Koreys tilini bilmagan talabalar uchun tarjimonlar jalb qilinadi. Talaba O‘zbekistonda bakalavr diplomini olgach, Koreyaga borib yarim yil o‘qiganidan so‘ng Koreya universiteti diplomiga ham ega bo‘ladi.
Qabul jarayoni Koreya universitetlari bilan bir xil tartibda o‘tkaziladi. Birinchi bosqichda abituriyentning maktab, litsey-kollejda oxirgi yillarda to‘plagan reyting ballari ko‘rib chiqiladi va eng yuqori ballga ega abituriyentlar tanlab olinadi. Ikkinchi bosqichda universitet o‘qituvchilari tomonidan suhbat o‘tkaziladi.
2019–2020 o‘quv yilida universitetga maktabgacha ta’lim, turizm menejmenti, koreys tili, go‘zallik menejmenti, kompyuter hisob-kitob menejmenti, internet va axborot kommunikatsiya, avtomobilsozlik, arxitektura muhandisligi, elektrotexnika-gaz muhandisligi yo‘nalishlarida 2000 nafar talaba qabul qilish ko‘zda tutilgan.
Izoh (0)