Фарғона шаҳрида Жанубий Корея билан ҳамкорликда янги университет очилади. У Фарғона шаҳридаги Корея Халқаро университети – Korea International University in Ferghana (KIUF) деб номланади. Бу ҳақда «Дарё» мухбири хабар бермоқда.
Университет 2019–2020 ўқув йилидан ўз фаолиятини бошлайди. Унда 16 та факультет очилиши режалаштирилган. Дастлаб таълим ўзбек ва корейс тилларида олиб борилади. Корейс тилини билмаган талабалар учун таржимонлар жалб қилинади. Талаба Ўзбекистонда бакалавр дипломини олгач, Кореяга бориб ярим йил ўқиганидан сўнг Корея университети дипломига ҳам эга бўлади.
Қабул жараёни Корея университетлари билан бир хил тартибда ўтказилади. Биринчи босқичда абитуриентнинг мактаб, лицей-коллежда охирги йилларда тўплаган рейтинг баллари кўриб чиқилади ва энг юқори баллга эга абитуриентлар танлаб олинади. Иккинчи босқичда университет ўқитувчилари томонидан суҳбат ўтказилади.
2019–2020 ўқув йилида университетга мактабгача таълим, туризм менежменти, корейс тили, гўзаллик менежменти, компьютер ҳисоб-китоб менежменти, интернет ва ахборот коммуникация, автомобилсозлик, архитектура муҳандислиги, электротехника-газ муҳандислиги йўналишларида 2000 нафар талаба қабул қилиш кўзда тутилган.
Изоҳ (0)