So‘nggi paytlarda hokimiyat vakillarining “qovun tushirishi”dan ajablanmay qo‘ydik, to‘g‘risi. Ularning oqni qora, qorani esa oq deya oqimga qarshi chiqishi odatiy holga aylangandek, nazarimizda. Yodingizda bor, Kasbi tumani IIB boshlig‘i Chori Ko‘charovning 16-iyuldagi qilmishi dunyoga ovoza bo‘ldi. Voqea tafsilotlarini o‘rgangan internet saytlariyu, ijtimoiy tarmoq foydalanuvchilari orqali ushbu voqeadan barcha birdek xabar topdi.
Kasbi tumani hokimligidan “Daryo” internet-nashriga e’tiroz xati kelib tushdi. Hokimlik tuman IIB boshlig‘i Chori Ko‘charov haqida yoritilgan haqiqatni bo‘hton deb atab, fermerlar ishchilari va miroblarni o‘z uslubida jazolagan IIB boshlig‘ini esa “mehnati, tirishqoqligi va o‘z bilimi bilan namuna bo‘lib kelayotgan” qahramonga aylantirgan.
Ma’lum qilinishicha, 22-iyul kuni tuman hokimi, tuman prokurori, IIB boshlig‘i va Soliq inspeksiyasi boshlig‘i ishtirokida bo‘lib o‘tgan yig‘ilishda, yig‘ilish qatnashchilari Chori Ko‘charov qilmishi haqida so‘z yuritgan internet saytlari mualliflarini aytgan gaplariga asos keltirmaganlikda ayblagan. Jumladan, hokimlik munosabatida shunday deyiladi: “Videotasvir va maqolalar mualliflari “zekovoz” avtomashinalariga odamlar majburan chiqarilganligi haqidagi bo‘htonlariga hech qanday asos keltira olishmagan”.
Internet saytlari mualliflari jumaladan “Daryo” muxbiri ham o‘z maqolasida Kasbi tumani IIB boshlig‘i qilmishi haqida so‘z yuritganda, fermer ishchilari va 2 nafar mirob avtobusga chiqarilganini yozadi. Va suhbatdoshlarning dala seminariga 20 nafar IIB xodimlari bilan birgalikda “zekovoz” — mahbuslarni olib ketuvchi avtomobil ham olib kelingani haqidagi fikrlarini ommaga ulashadi. Ammo “zekovoz”ga odam mindirilgani xususida lom-lim demaydi. Hokimiyat esa mualliflarni “zekovoz”ga odam mindirdi deb yozgan deya ayblayapti.
Tuman hokimligi Chori Ko‘charovni oqlash ilinjida dala seminari viloyat hokimi va tuman hokimi farmoyishiga ko‘ra, 2019-yilning 2-iyulidan 16-iyuliga qadar har kuni ertalab 6:00 va 12:00 da o‘tkazilishi kerakligini yozib, seminar ko‘rgazmali ekanligiga urg‘u beradi. Qiziq, ijtimoiy tarmoqlar va fermerlar taqdim etgan videolarda seminar o‘tkazilayotgan joyda birorta ham ko‘rgazma qurollari ko‘rinmay, “zekovoz” va IIB xodimlari ko‘rinib qolgan. Yoki IIB boshlig‘ining ko‘rgazmali seminarida 20 nafar IIB xodimlari, kishan, “zekovoz” va avtobus ko‘rgazmali qurollar vazifasini o‘tab beradimi?
Bundanam qizig‘i hokimlik jurnalistlarni ikkinchi tomon fikrini eshitmaslikda ayblaydi. Holbuki, o‘sha kuni “Daryo” muxbiri IIB boshlig‘i bilan bir necha marotaba bog‘lanishga urindi. Viloyat IIB matbuot xizmati orqali ham holatga izoh so‘radi. Bu haqda maqolada ham so‘z borgan. Biroq Chori Ko‘charov xatti-harakatiga izoh berishni istamadi. Qisqasini aytganda, jurnalistlar bilan gaplashishni o‘ziga “ep ko‘rmadi”.
Hokimlikka ko‘ra, o‘sha kungi seminarda IIB boshlig‘i bilan birgalikda tuman qishloq xo‘jaligi bo‘limi boshlig‘i A.Arabov, tuman agroinspeksiya boshlig‘i Q.Bozorov ham ishtirok etgan. Seminarga 58 nafar fermer chaqirilgan bo‘lsa-da, 11 nafar fermer sababsiz kelmagan. 8 nafar fermer o‘rniga ularning ishchilari kelgan. Hokimlikning yozishicha, o‘sha kuni fermer ishchilariyu, 2 nafar suvchidan iborat 10 kishi IIB tomonidan hech qanday kuch ishlatilmagan holda, derazalari ochiq avtobusda IIBga olib ketilgan.Va o‘sha joyda tushuntirish xatlari olinib, qisqa muddatda IIB hovlisidan qo‘yib yuborilgan.
Endi hokimlikka savol: Seminarda qatnashgan 8 nafar fermer ishchilari va 2 nafar suvchiga dala seminarining o‘zida tushuntirish ishlari olib borilsa bo‘lmasmidi? Hech kimni qo‘rqitish niyati yo‘q ekan, 10 nafar kishinining 20 nafar IIB xodimi qurshovida xuddi aybdorlardek IIB binosiga olib borilishi nimadan dalolat? Ko‘rgazmali seminarga “zekovoz” nega kerak?
Tuman hokimligi o‘z munosabatida fermer Akrom Novotov haqida ham to‘xtalib o‘tib, uni tuhmat qilishda ayblaydi. Hokimlik iddaosiga ko‘ra, Akrom Novotov doimiy ravishda Toshkent shahrining Shayxontohur tumanida tursa-da, “IIB xodimlari uyimga keldi”, deya ommani chalg‘itgan. Shu boisdan ham 22-iyul kuni o‘tkazilgan hokimlik yig‘ilishida tuman prokurori, tuman “Nuroniy” jamg‘armasi raisi va bir necha fermerlar Akrom Novotovning xatti-harakatini qoralagan.
Fermer Akrom Novotov “Daryo” muxbiri bilan suhbati davomida IIB boshlig‘ining xatti-harakatlari oshkor etilgan maqoladan so‘ng, IIB xodimlari o‘sha kuni seminarda qatnashgan fermerlardan haqiqatni inkor etuvchi tushuntirish xatlari ham olgan. Hatto o‘sha kuni qo‘liga kishan taqilgan suvchilardan ham internetda chiqib ketgan ma’lumotlarni rad etuvchi tushuntirish xati yozib berishini so‘ragan. Ammo suvchilar buni rad etishgan.
Kasbi tumani IIB boshlig‘i Chori Ko‘charovning xatti-harakati haqida internetda shov-shuv tarqalgach, “Daryo” muxbiriga Kasbi tumanining Qamashi qishlog‘ida yashovchi Aziz Niyozov ham murojaat qilib, Chori Ko‘charovdan aziyat chekkanini, ammo qaysi tashkilotga murojaat qilsa ham masala e’tiborsiz qolib kelganini bildirdi.
— Kechasi uxlab yotgan joyimda yotog‘imga kirib kelgan Kasbi tumani IIB xodimlari boshliq Chori Ko‘charov topshirig‘iga ko‘ra, meni yotoqxonamda o‘lasi qilib urdi, — deydi Aziz Niyozov. – IIB xodimlarining yarim kechasi uyimizga dabdurustdan bostirib kirishi va meni urishi farzandlarimni qo‘rqitib yuborgan.
Aziz Niyozovning ma’lumot berishicha, u 2018-yil avgust oyida bazmdan shirakayf bo‘lib chiqqach, qishloqdoshlari bilan janjallashgan. Boz ustiga fuqarolarni tinchlantirishga uringan, mahalla profilaktika inspektoriga ham zo‘rlik ishlatib, pogonini yulib olgan, telefonini tortib olgan. Bunga javoban esa Chori Ko‘charov boshchiligidagi IIB xodimlari aybdorni uxlab yotgan joyida, yotoqxonasida, farzandlari ko‘z o‘ngida o‘lasi qilib kaltaklaydi.
— Mayli men qilgan xatoim uchun 3 oyga qamalib chiqdim, harakatimga javob berdim, — deydi Aziz Niyozov. – Nega endi Chori Ko‘charov xatti-harakatiga javob bermayapti? Nima uchun kechasi fuqaro xonadoniga bostirib kirgan IIB boshlig‘i farzandlarim oldida meni kaltaklagani va xo‘rlagani haqidagi murojaatlarimga e’tibor qaratilmayapti?
Murojaatchining aytishicha, u IIB boshlig‘i Chori Ko‘charov harakati ustidan mutasaddi tashkilotlarga ko‘p marotaba murojaat qilgan. Ammo murojaatlari natijasiz qolmoqda.
Xayriyatki, Qashqadaryo viloyati IIB Kasbi tumani hokimligidek ko‘rinib turgan haqiqatdan ko‘z yummadi. Borini tan olib, aybdorni jazoladi. Chori Ko‘charovni lavozimidan ozod qildi.
Izoh (0)