Тошкентда Чорвачилик, паррандачилик, балиқчилик, қоракўлчилик, асаларичилик ва қуёнчилик тармоқларини ривожлантириш бўйича устувор йўналишларга бағишланган семинар-йиғилиш ўтказилди дея маълум қилди вазирлик матбуот хизмати.
Маълумотларга кўра, бугунги кунда қорамолнинг 94 фоизи, қўй ва эчкининг 84 фоизи, парранданинг 58 фоизи аҳоли хонадонларида боқилади. Бироқ паррандачиликда озиқанинг 85 фоизи импорт қилиниб, ҳалигача кўп миқдорда соя ва кунгабоқар шроти, маккажўхори четдан олиб келинади. Шу боисдан йиғилишда маҳаллий шароитда юқори қувватли озиқа ем ишлаб чиқаришни ривожлантириш зарурлиги таъкидланди.
Тери, гўшт ва момиқ жун олиш учун боқилаётган қуёнчилик йўналишлари ҳам ривожланмоқда. Жумладан, бугунги кунда аҳоли хонадонлари ва қуёнчилик хўжаликларида 112 минг 600 дан зиёд қуён боқилмоқда. Уларнинг 66 мингдан ортиғи зотдор қуён ҳисобланади. Келгусида Ветеринария ва чорвачиликни ривожлантириш давлат қўмитаси тизимидаги Чорвачилик ва паррандачилик илмий-тадқиқот институти ҳузурида «Қуёнчилик селексияси ва генетика маркази» ташкил этилиши кўзда тутилган.
«2019 йил учун республикамизда асаларичилик соҳасини стратегик ривожлантириш йўналиши белгиланиб, бунда қишлоқ хўжалиги экинлари ва боғларни асаларилар билан чанглатиш агротехникаси амалиётда қўлланилмоқда. Самарқанд вилоятининг Жомбой ва Булунғур туманларида 1 минг 500 гектар боғлардаги мевали ўсимликлар 7 минг 500 дан зиёд асалари оиласи орқали чанглатилди. Мазкур агротехниканинг қўлланилиши натижасида фақатгина 90 гектар ерга экилган гилос боғининг ҳар бир гектаридан камида 10 тоннадан ҳосил олинишига эришилди», — дейди «Ўзбекистон асаларичилари» уюшмаси раиси Шерали Суярқулов.
Очиқ мулоқот тарзида давом этган йиғилишда вилоятлардан келиб қатнашаётган корхоналар раҳбарлари, тадбиркорлар муаммолари эшитилди. Уларни ҳал қилиш бўйича мутасаддиларга зарур топшириқлар берилди.
Изоҳ (0)