28-iyul kuni Axborot va ommaviy kommunikatsiyalar agentligida Davlat test markazi direktori Majid Karimov va markaz mas’ullari ishtirokida matbuot anjumani tashkil etildi. Bu haqda “Daryo” muxbiri Madina Nurman xabar bermoqda.
Oliy ta’lim muassasalari bakalavriatiga qabul test sinovlari haqidagi so‘nggi ma’lumotlar haqida gapirar ekan, DTM rahbari shu kunga qadar ro‘yxatdan o‘tgan abituriyentlar soni 1 066 925 bo‘lsa (979436 nafari test sinovida ishtirok etadi), ulardan 57 ming nafari kirish imtihonlari uchun ruxsatnoma olmaganini qayd etdi.
Majid Karimov, Davlat test markazi direktori:
—Ayni paytda ularning aloqa uchun qoldirgan raqamlariga SMS-xabarnomalar yuborib, ruxsatnomalar olishlarini ta’minlash harakatlari davom etmoqda. Mabodo abituriyent test kunigacha ham ruxsatnomasini olmasa, sinovlar o‘tkaziladigan binolarda ham ta’lim muassasalari qabul komissiyalari tomonidan guruhlar tuzilib, ruxsatnoma berilishi tashkil etiladi.
— Agar abituriyent ma’lum bir uzrli sabablarga ko‘ra, masalan, transport yoki sog‘ligi yuzasidan muammo tufayli test kunida imtihonga kech qolsa, uni sinovlar o‘tadigan boshqa kunga ko‘chirish masalasini davlat komissiyasiga taklif qilib kiritganmiz. Ijro etuvchi bo‘lganimiz sababli so‘nggi qaror ularda qoladi. Agar ular tavsiya bersa, abituriyentni o‘tkazishimiz mumkin.
— Abituriyentlarning ro‘yxatdan o‘tishi, ammo ma’lumotlari operator yoki tashkilotchilar tomonidan bazaga kiritilmay qolinishi muammosi ham bor. Abituriyent oliy ta’lim muassasasi yoki davlat xizmatlari markaziga kelganida ro‘yxatdan o‘tgan, ammo qaydnomadagi ma’lumotlari bazada operator xatosi tufayli to‘ldirilmagan. Keyingi abituriyent kelganida undan oldingi ism-familiyaga ikkinchi abituriyent ma’lumotlari kiritilishi oqibatida chalkashlik sodir etilgan. Hozir ana shu xatolik tufayli 200 nafar abituriyent masalasida davlat komissiyasiga murojaat qilingan. Yakuniy xulosani komissiya berganidan so‘ng ular ham testga qo‘yilishini ta’minlashga harakat qilamiz.
Izoh (0)