AQShning O‘zbekistondagi elchisi Deniyel Rozenblyum Farg‘onaga tashrifi chog‘ida O‘zbekiston haqida “ochiq eshiklar siyosati yuritayotgan mamlakat” deya baho berdi. Bu haqda jurnalist Muhammadjon Obidov xabar berdi.
Xabarda aytilishicha, Farg‘ona viloyatida bugun 384 ta chet el kapitali ishtirokidagi korxonalar faoliyat yuritmoqda. 2018-yil yakuniga ko‘ra ularda viloyat YaXM hajmining uchdan bir qismi ishlab chiqarildi. Amerika ishbilarmonlar doirasi vakillari va kompaniyalari ham viloyatga katta qiziqish bildiryapti. Bundan tashqari qishloq xo‘jaligi, ta’lim va gumanitar sohalardagi hamkorlik tobora mustahkamlanib borayotganini kuzatish mumkin.
“Ruzvelt dunyoda barcha millatlar ahil yashasagina mamlakatlar rivojlanadi, xalqlar, ayniqsa yoshlar kelajagi porloq bo‘ladi, degandi, — deb aytgan Farg‘ona viloyat hokimi Shuhrat G‘aniyev elchi bilan bo‘lgan uchrashuvda. — Amerika olisda bo‘lsa-da dillarimiz, orzu-umidlarimiz bir biriga yaqin”.
Uchrashuvda tomonlar Farg‘ona oliy o‘quv yurtlarida mehnat qilayotgan Amerikalik olim-mutaxassislarning faoliyat muddati yana bir yilga cho‘zilishi, tibbiyot va gumanitar sohalarda beg‘araz zarur dori-darmonlar yetkazib berish, uzumchilikda hosilni sovuqxonalarda uzoq vaqt saqlash va eksport qilishga ko‘maklashuvchi vositalar taqdim etishni davom ettirishga kelishgan.
“Kelgusi oyda Farg‘ona viloyatida bo‘ladigan xalqaro iqtisodiy forumda AQSh kompaniyalari vakillari qatnashishidan manfaatdormiz”, — degan Shuhrat G‘aniyev.
AQSh elchisi Deniyel Rozenblyum Farg‘ona viloyatiga tashrifida Farg‘ona davlat universiteti, “Muruvvat uyi” va Oltiariq tumanidagi uzumchilikka ixtisoslashtirilgan “Boymatov” fermer xo‘jaligi faoliyati bilan ham tanishgan.
Izoh (0)