Qashqadaryoda aholini elektr toki bilan ta’minlovchi mavjud 8884 ta transformatorning 65 foizi yaroqsiz holga kelib qolgan. Bu haqda Qarshi shahridagi “Afsona” mehmonxonasida Qashqadaryo hududiy elektr tarmoqlari Aksiyadorlik jamiyati rahbariyati bilan bo‘lib o‘tgan muloqotda ma’lum qilindi.
Matbuot anjumanida aytilishicha, Qashqadaryo viloyatida ayni kunda jami 660 ming elektr iste’molchisi mavjud bo‘lib, iste’molchilarga 27 048 km elektr tarmoqlari orqali elektr toki uzatiladi. Eng yomoni mazkur elektr tarmoqlarining 60 foizi ham eskirgan bo‘lib, yangilashga muhtoj.
Qashqadaryo hududiy elektr tarmoqlari AJ rahbari Anvar Muzapovning jurnalistlarga ma’lumot berishicha, ayni kunda O‘zbekistonda 1 kV elektr energiyasini ishlab chiqarish uchun 450 so‘m mablag‘ sarflanadi. Ammo aholi 1 kV elektr energiyasi uchun 250 so‘m pul to‘laydi. Mutasaddining qo‘shimcha qilishicha, O‘zbekistonda elektr energiyasi uchun to‘lov boshqa mamlakatlarga nisbatan sezilarli darajada arzon. Qo‘shni Tojikiston respublikasida aholi 1 kV elektr energiyasi uchun 380 so‘m miqdorda pul to‘lasa, Rossiya aholisi 1kV elektr energiyasi uchun 379 so‘m miqdorda haq to‘lar ekan.
Davlat rahbarining 2018-yil dekabr oyidagi viloyatga tashrifi chog‘ida berilgan topshiriqlar rejasiga ko‘ra, Qashqadaryo hududiy elektr tarmoqlari tomonidan 730 km elektr tarmoqlari va 230 ta transformator punktlarini rekonstruksiya va modernizatsiya qilishi lozimligi belgilangan bo‘lib, 1960 km uzunlikdagi elektr tarmoqlari va 655 dona transformator punktlarini mukammal ta’mirlash rejalashtirilgan.
— Ayni kunga qadar 426,2 km elektr tarmoqlari va 151 dona transformator punktlari rekonstruksiya va modernizatsiya qilindi, — deydi Qashqadaryo hududiy elektr tarmoqlari AJ matbuot xizmati rahbari Murodulla Komilov. – Shuningdek, 1565 km uzunlikdagi elektr tarmoqlari va 521 dona transformator punktlari mukammal ta’mirlandi.
Matbuot anjumanida jurnalist va blogerlar o‘zini qiziqtirgan savollarga javob oldi.
Qashqadaryo hududiy elektr tarmoqlari AJ rahbari Anvar Muzapov “Daryo” muxbirining G‘uzor tuman elektr tarmoqlari korxonasida elektr energiyasi uchun plastikka pul to‘langach, pulni “zagruzka” qilish aholiga muammo tug‘dirayotgani, fuqarolar 4–5 soatlab vaqtini “zagruzka” uchun sarflayotgani xususida “Daryo” tahririyatida maqola chop etilganini va mazkur chiqishga mas’ullar nima uchun hech qanday munosabat bildirmagani haqida so‘radi.
— Elektr energiyasi uchun to‘langan pulni plastikka “zagruzka” qilish muammosi nafaqat G‘uzorda viloyatning barcha tumanlari, hatto Qarshi shahrida ham bor, — deydi Anvar Muzapov. – Buning oldini olish uchun harakat qilindi, albatta. O‘sha maqoladan so‘ng, G‘uzor tumani aholisi uchun “zagruzka” apparati ham olib kelindi. Ammo bu muammoning yechimi bo‘lolmadi. Shuning uchun bu borada qulaylik yaratildi. Rejaga ko‘ra, 2020-yilga qadar dastlab Qarshi shahri aholisi uchun 60 ming dona yangi elektr hisoblagich sotib olib, aholiga bepul tarqatishni mo‘ljal qilyapmiz. Yangi elektr hisoblagichning qulay tomoni shundan iboratki, hisobiga pul tushgach, elektr energiyasi uzatishni boshlaydi. Pul tugagach, o‘chadi. Xuddi telefonimizga pul to‘laganimizda to‘g‘ridan to‘g‘ri ishlab ketgani kabi, bu elektr hisoblagich ham pul to‘langach ishlab ketadi. “Zagruzka” degan muammo bo‘lmaydi.
Anvar Muzapovga ko‘ra, elektr energiyasini hisobga olish va nazorat qilishning avtomatlashtirilgan tizimiga o‘tishini ta’minlovchi mazkur elektr hisoblagichlarning ayni kundagi narxi 784 ming so‘m turadi. Viloyat bo‘yicha 660 mingta iste’molchiga xuddi shunday elektr hisoblagich xarid qilish uchun mahalliy budjet hisobidan 600 milliard so‘m pul ajratilgan.
Izoh (0)