Erdo‘g‘on Shavkat Mirziyoyevning ikki davlat o‘rtasidagi munosabatlarning bugungi darajasiga qo‘shgan hissasini qayd etdi

Shavkat Mirziyoyev va Turkiya prezidenti Rajab Toyyib Erdo‘g‘on telefon orqali muloqot qildi. Bu haqda Prezident matbuot xizmati ma’lum qildi.

Suhbat avvalida Turkiya yetakchisi davlat rahbarini tug‘ilgan kuni bilan samimiy muborakbod etib, O‘zbekiston Prezidentining mamlakatlar o‘rtasidagi ko‘p qirrali munosabatlarda bugungi yuksak darajaga erishishga qo‘shgan shaxsiy hissasini alohida qayd etdi.

Muloqot chog‘ida ikki tomonlama hamkorlikning bugungi holati va istiqbollari muhokama qilindi. Kuni kecha Anqarada bo‘lib o‘tgan hukumatlararo komissiyaning navbatdagi yig‘ilishi va O‘zbekiston—Turkiya biznes forumi natijalari samarali bo‘lgani katta mamnuniyat bilan qayd etildi.

Turli yo‘nalishlarda, avvalo, savdo-iqtisodiy, investitsiyaviy, innovatsion va madaniy-gumanitar sohalarda erishilgan kelishuvlar va imzolangan bitimlarni keng ko‘lamda amalga oshirish borasida tomonlarning intilishi qat’iy ekani ta’kidlandi.

Davlat rahbarlari xalqaro va mintaqaviy ahamiyatga molik dolzarb masalalar yuzasidan fikr almashdi, shuningdek, bo‘lajak ikki tomonlama tadbirlar rejasini ko‘rib chiqdi.