Prezidentning Samarqand viloyatidagi Xalq qabulxonalariga joriy yil ikkinchi choragida jismoniy va yuridik shaxslardan 11 mingta, jumladan, viloyat Xalq qabulxonasiga 2446 ta murojaat kelib tushgan. Bu haqda O‘zA xabar berdi.
Bu ko‘rsatkich o‘tgan yil ikkinchi choragida 13444 taga teng edi.
Samarqand viloyati Xalq qabulxonasining ma’lumotlarida qayd etilishicha, bu murojaatlarning 5197 tasi qanoatlantirilgan, 4822 tasi bo‘yicha tushuntirish berilgan, 19 tasi rad etilgan, 849 ta murojaat tegishli tashkilotlar tomonidan o‘rganilmoqda.
Murojaatlarning eng ko‘pi, ya’ni 1193 tasi uy-joy va yer bilan ta’minlash masalalariga oid bo‘lgan. Shuningdek, gaz, elektr energiyasi va ichimlik suvi ta’minoti bilan bog‘liq 894 ta, ishga joylashish bo‘yicha 665 ta, aliment undirish masalasida 719 ta murojaat tushgan.
Shuni ham ta’kidlash kerakki, fuqarolar orasida ham turli idoralarga ketma-ket murojaatlar qilish holatlari ham kuzatilmoqda. Prezident Administratsiyasi tomonidan eng ko‘p ariza va shikoyatlar bilan murojaat qilgan fuqarolar bo‘yicha o‘tkazilgan tahlillarda qayd etilishicha, Samarqand viloyatidan 28 nafar fuqaro turli idoralarga 2892 marta murojaat qilgan.
O‘tgan davrda murojaatlar bilan ishlash jarayonida yo‘l qo‘yilgan qonunbuzilish holatlari yuzasidan xalq qabulxonalari tomonidan mutasaddi idoralarga 43 ta takliflar kiritilgan. Buning natijasida 33 nafar rahbar va mas’ul xodimlar intizomiy jazoga, 8 nafari ma’muriy javobgarlikka tortilgan va 2 nafarining mehnat shartnomasi bekor qilingan.
Izoh (0)