Эрдўғон Шавкат Мирзиёевнинг икки давлат ўртасидаги муносабатларнинг бугунги даражасига қўшган ҳиссасини қайд этди

Шавкат Мирзиёев ва Туркия президенти Ражаб Тоййиб Эрдўғон телефон орқали мулоқот қилди. Бу ҳақда Президент матбуот хизмати маълум қилди.

Суҳбат аввалида Туркия етакчиси давлат раҳбарини туғилган куни билан самимий муборакбод этиб, Ўзбекистон Президентининг мамлакатлар ўртасидаги кўп қиррали муносабатларда бугунги юксак даражага эришишга қўшган шахсий ҳиссасини алоҳида қайд этди.

Мулоқот чоғида икки томонлама ҳамкорликнинг бугунги ҳолати ва истиқболлари муҳокама қилинди. Куни кеча Анқарада бўлиб ўтган ҳукуматлараро комиссиянинг навбатдаги йиғилиши ва Ўзбекистон—Туркия бизнес форуми натижалари самарали бўлгани катта мамнуният билан қайд этилди.

Турли йўналишларда, аввало, савдо-иқтисодий, инвестициявий, инновацион ва маданий-гуманитар соҳаларда эришилган келишувлар ва имзоланган битимларни кенг кўламда амалга ошириш борасида томонларнинг интилиши қатъий экани таъкидланди.

Давлат раҳбарлари халқаро ва минтақавий аҳамиятга молик долзарб масалалар юзасидан фикр алмашди, шунингдек, бўлажак икки томонлама тадбирлар режасини кўриб чиқди.