Samarqand viloyatida 2019-yilning 20-fevral kuni Nexia avtomobili va Midibus avtobusi ishtirokidagi yo‘l-transport hodisasi oqibatida Nexia yo‘lovchisi halok bo‘lgan. Jinoyat ishlari bo‘yicha Jomboy tumani sudida haydovchilarning sudi bo‘lib o‘tdi.
Hodisa 20-fevral kuni soat 14:00 atrofida Jomboy tumani No‘sh mahallasi hududidan o‘tuvchi 4-R 48 “Jomboy—Eshimoqsoq” avtomobil yo‘li bilan “Payariq—Jomboy” yo‘nalishining 11-kilometrida sodir bo‘lgan. Doston Suyunov boshqaruvida bo‘lgan Nexia avtomashinasi bilan Shahobiddin Ko‘bayev boshqaruvchida bo‘lgan, “Zilola O‘ktam qizi” MChJga tegishli Midibus rusumli avtobus yo‘l harakati qoidalarini talablarini qo‘pol ravishda buzgan. Oqibatda Nexia avtomashinasidagi yo‘lovchi R.Kubayeva voqea joyida vafot etgan bo‘lsa, yo‘lovchilar L.Abdumurodova, Sh.Fayzullayev va L.Usmonovalar turli xil darajadagi tan jarohatlari olgan.
Jinoyat ishlari bo‘yicha Jomboy tumani sudi raisi M.Sheryigitovning “Daryo”ga ma’lum qilishicha, sudlanuvchi Doston Suyunov O‘zbekiston Respublikasi Jinoyat Kodeksining 266-moddasi 2-qismi (Transport vositalari harakati yoki ulardan foydalanish xavfsizligi qoidalarini buzish) bilan aybli deb topilib 2 yil muddatga transport vositalarini boshqarish huquqidan mahrum qilinib, 2 yil 4 oy axloq tuzatish ishlari jazosi tayinlangan. Sudlanuvchi Shahobiddin Ko‘bayev esa O‘zbekiston Respublikasi Jinoyat Kodeksi 117-moddasi 2-qismi (Xavf ostida qoldirish odam o‘limiga olib kelishi) va 266-moddasi 2-qismi bilan aybli deb topilib 3 yil muddatga transport vositalarini boshqarish huquqidan mahrum qilinib, 3 yil muddatga axloq tuzatish ishlari jazosi tayinlangan.
Izoh (0)