Бухорода Халқаро олимпия куни муносабати билан «Токио сари йўл» шиори остида оммавий юриш марафони ўтказилди. 10 мингдан ортиқ кенг жамоатчилик вакиллари «Ситора» болалар боғидан «Арк» қўрғонигача бўлган масофани босиб ўтди. Бу ҳақда марафонда иштирок этган «Дарё» мухбири хабар бермоқда.
Машҳур спортчилар, эстрада юлдузлари, театр актёрлари, ҳаваскор спорчилар, турли идора-ташкилот, таълим муассасаларининг раҳбар ва вакилларидан иборат иштирокчилар автотранспортларсиз ҳаракатланиш инсон саломатлиги учун муҳим эканлигини ўз хурсандчиликлари орқали ифодалади.
— Мен учинчи йилдирки Халқаро Олимпиада куни муносабати билан ўтказиладиган барча спорт тадбирларида иштирок этаман. У хоҳ енгил атлетика, хоҳ югуриш, юриш ва хоҳ веломарафон бўлсин, ҳеч бирини қолдирмайман. Бундай тадбирлар, мусобақалар мен учун жуда ёқимли. Сени ёшлар қўллаб-қувватлаб турганини ҳис қилиб туриш янаям ажойиб. Мана шундай оммавий тадбирларда иштирок этиш ҳам кайфиятни кўтаради, ҳам инсоннинг фаоллигини оширади. Шахсан ўзим спорт машғулотлари орқали турли хасталиклардан фориғ бўлдим, — деди марафон иштирокчиси 69 ёшли Карима Ҳусайнова.
«Арк» қўрғони майдонига тўпланган марафон иштирокчилари оммавий тарзда гимнастика машғулотларини ҳам бажарди. Майдон бўйлаб олимпиада белгисини ифодаловчи 5 хил рангдаги футболкаларда олимпиада ҳалқаси шакллантирилди. Уларнинг орқа фонида эса халқаро спорт мусобақаларида ғолиб бўлган спортчилар саф тортди. Спортнинг бадиий гимнастика, бокс, таэквондо турлари билан шуғулланадиган спортчилар маълум шакл асосида ҳаракатланди.
Кечки пайт «Кўҳна ва боқий Бухоро» мажмуасидаги амфитеатрда «Олимпия куни»га бағишланган гала-концерт бўлиб ўтди.
Изоҳ (0)