Shu kunlarda internet tarmog‘ida Samarqand shahrining tarixiy qismi UNESCO’ning butunjahon merosi ro‘yxatidan o‘chirilishi mumkinligi haqidagi xabarlar paydo bo‘ldi, deb yozmoqda O‘zA.
“Yuksalish“ umummilliy harakati mazkur masalaga o‘z munosabatini bildirdi. Tarqalgan xabarlarga ko‘ra, shaharning tarixiy markazida barpo etilayotgan ko‘pqavatli yangi binolar madaniy qiymatga ega tarixiy obidalarga zarar yetkazayotgani sabab qilib ko‘rsatilmoqda.
Shu munosabat bilan, “Yuksalish” umummilliy harakati vakillari masalani yaqindan o‘rganish maqsadida 28-iyun kuni Samarqand shahriga tashrif buyurdi. Qurilish ishlari amalga oshirilishi belgilangan hududda viloyat hokimligi vakillari bilan uchrashuv tashkil etilib, rejalashtirilayotgan bino loyihalari ko‘zdan kechirildi.
Jumladan, UNESCO’ning Butunjahon merosi qo‘mitasining 43-sessiyasi arafasida tayyorlangan hisobotida ko‘rsatilgan tarixiy obyektlar, jumladan shaharning tarixiy qismiga tutash hududlar — Namozgoh jome masjidi atrofi, Ibn Sino ko‘chasi bo‘ylab binolar, “Registon Plaza” mehmonxonasi, “Afrosiyob” mehmonxonasi kabi qator bino va hududlar borib ko‘rildi.
Ma’lum bo‘lishicha, bugungi kunda ushbu obyektlarda hech qanday qurilish va ta’mirlash ishlari boshlanmagan. Shunday bo‘lsa-da shahar hokimligi tomonidan ushbu hududlarda haqiqatan ham ko‘pqavatli yangi binolar barpo etilishi rejalashtirilmoqda. Shu bilan birga, uchrashuvda hokimlik UNESCO’ning tegishli xulosasini olmasdan qurilish va ta’mirlash ishlarini boshlamasligi aytib o‘tildi.
“Yuksalish” umummilliy harakati vakillari vaziyatni o‘rganish jarayonida bu kabi tushunmovchilik mas’ullarning rejalashtirilgan qurilish va ta’mirlash ishlari haqida to‘liq ma’lumotlarni UNESCO’ga o‘z vaqtida taqdim etmaganliklari fonida yuzaga kelgan, deb hisoblaydi. Shuningdek, ushbu masala joriy yilning 30-iyun – 10-iyul kunlari Boku shahrida bo‘lib o‘tadigan Butunjahon merosi qo‘mitasining 43-sessiyasi davomida barcha tomonlar ishtirokida muhokama qilinib, umumiy yechim ishlab chiqilishiga umid bildiradi.
Izoh (0)