Mudofaa vazirligi jamoasi “REMBAT – 2019” xalqaro tanlovida qatnashishga tayyorgarik ko‘rmoqda

Xalqaro armiya o‘yinlariga kiritilgan “REMBAT” – “Eng ilg‘or ta’mirlash va evakuatsiya batalyoni” ko‘rik-tanloviga Mudofaa vazirligi jamoasi ham qizg‘in tayyorgarlik ko‘rmoqda, ma’lum qildi vazirlik matbuot xizmati.

Musobaqa shu yilning 3—17-avgust kunlari Rossiya Federatsiyasining Omsk shahrida bo‘lib o‘tadi.“Eng ilg‘or ta’mirlash va evakuatsiya batalyoni” ko‘rik-tanlovi tashkil topganiga 3 yil bo‘lgan bo‘lsa, O‘zbekiston Mudofaa vazirligi jamoasi mazkur bahsda ishtirok etishga ilk bor kirishmoqda.

Hozirda Chirchiq poligonida kapitan Husan Muhammadiyev boshchiligidagi jamoa uch bosqichli mashg‘ulotlarni bajarishga kirishgan.

“Oldimizda turgan vazifa judayam mas’uliyatli va buni musobaqada qatnashadigan shaxsiy tarkibning har bir a’zosi ich-ichidan his etib turibdi. Eng muhimi, yigitlarning o‘zlariga bo‘lgan ishonchi mustahkam. Tinimsiz olib borilayotgan mashg‘ulotlar esa bizni g‘alaba sari toboro yaqinlashtirib boraveradi. Nasib qilsa, yurtimizga g‘alaba bilan qaytib kelamiz”, – deydi podpolkovnik Ismoil Navro‘zov.