Sog‘liqni saqlash vazirligi tashabbusi bilan haftaning har shanba kuni mamlakat bo‘ylab keng ko‘lamli ommaviy sog‘lomlashtirish tadbirlari tashkil etilmoqda. 29-iyun kuni ham ushbu ezgu an’ana davom etgan holda, “Jismoniy faollik – uzoq umr garovi” shiori ostida turli tadbirlar tashkil etildi, deya xabar berdi vazirlik matbuot xizmati.
Jahon sog‘liqni saqlash tashkilotining ma’lumotiga ko‘ra, bugungi taraqqiyot tufayli insoniyat hayot tarzida kamharakatlilikka odatlanayotgani ko‘plab tibbiy-ijtimoiy muammolarga sabab bo‘lmoqda.
Dunyo miqyosida qayd etilayotgan o‘lim holatining har to‘rtdan biriga aynan shu omil sabab bo‘lmoqda.
Masalan, sut bezi va yo‘g‘on ichak saratoni, qandli diabet, yurak ishemik kasalliklari yuzaga kelishining 25-30 foiziga ana shu jihat jiddiy turtki bo‘ladi.
Bunday muammoning oldini olish har bir insonning o‘z qo‘lida. To‘g‘ri, bugungi tig‘iz ish kuni soatlab sport mashg‘ulotlari bajarishga imkon bermasligi mumkin.
Biroq, hech bo‘lmaganda kunda-kunora 20-30 daqiqalik jismoniy mashqlarni bajarish, kuniga 1-2 kilometr piyoda yurish uchun hammada imkon topiladi.
Shifokorlarning aytishicha, ana shu ozgina harakat ham organizmni kislorodga to‘yintirish, modda almashinuvini yaxshilashda ijobiy natija beradi. Bunday kun tartibiga odatlangan inson xafaqon, infarkt, insult, saraton kabi og‘ir kasalliklardan o‘zini himoyalaydi.
Shundan kelib chiqqan holda Sog‘liqni saqlash vazirligi tomonidan davlat va nodavlat tashkilotlar hamkorlikda aholi orasida sog‘lom turmush tarzini va jismoniy faollikni targ‘ib etish bilan bog‘liq ommaviy tadbirlarga alohida e’tibor qaratilmoqda.
Xalqga tibbiy-profilaktika va patronaj yordamini ko‘rsatish, onalar va bolalar salomatligini muhofazalash bilan bog‘liq chora-tadbirlar ko‘lami ham kengayib borayotir. Amalga oshirilgan keng ko‘lamli islohotlar natijasida fuqarolarning o‘rtacha umr ko‘rish davomiyligi 1990-yildagi 67 yoshdan 2018- yilda 74 yoshga uzaydi.
Har shanba kuni an’anaviy tarzda o‘tkazilayotgan ommaviy sog‘lomlashtirish tadbirlari bu boradagi xayrli ishlarni izchil davom ettirish, xalq salomatligini asrashda muhim omil bo‘lmoqda.
Bu galgi aksiya ham poytaxtda va barcha hududlarda uyushqoqlik bilan tashkil etildi.Aksiya doirasida yirik tadbirlardan biri poytaxtdagi “Milliy” stadionda o‘tkazildi.
Sog‘liqni saqlash vazirligi va O‘zbekiston Xotin-qizlar qo‘mitasi xodimlari, turli davlat va nodavlat tashkilotlar va keng jamoatchilik vakillari, faol yoshlar 5 kilometrlik masofani piyoda bosib o‘tdi.
Qoraqalpog‘iston Respublikasi, viloyatlar va Toshkent shahrida tashkil etilgan ushbu ommaviy tadbirlarda tibbiyot muassasalari shifokorlari, hududlardagi hamkor tashkilotlar vakillari hamda mahalla faollari ishtirok etishdi.
Izoh (0)