Xurshida Ubaydullayeva XII Koreya Xalqaro ixtirochi ayollar ko‘rgazmasi – KIWIE 2019da oltin medal bilan taqdirlandi. Bu haqda Innovatsion rivojlanish vazirligi matbuot xizmati “Daryo”ga xabar berdi.
O‘zbekiston delegatsiyasi a’zolaridan O‘zR FA Genomika va bioinformatika markazi katta ilmiy xodimi, kimyo fanlari nomzodi Xurshida Ubaydullayeva markaz olimlari bilan hamkorlikda gen-nokaut texnologiyasi asosida yaratilgan tezpishar, yuqori hosildorlikka ega, uzun va sifatli tolali, qurg‘oqchilikka chidamli “Porloq 1”, “Porloq-2” navlariga olingan patenti bilan qatnashdi va ushbu ilmiy ishlanma yuzasidan taqdimot berdi.
Bu esa xalqaro ekspertlar tomonidan o‘rganildi va Koreya Ixtirochi ayollari Assotsiatsiyasi Prezidenti Myung-Xe Yon tomonidan munosib baholanib, oltin medal bilan taqdirlandi.
Yaratilgan g‘o‘za navlari Porloq-1, Porloq-2, Porloq-3 va Porloq-4 bir qancha ustunliklarga ega bo‘lishi bilan bir vaqtda, uning chigitidan ajratib olingan yog‘ inson hayotiga mutlaqo zararsiz ekanligi Sog‘liqni saqlash vazirligining Sanitariya, gigiyena va kasalliklar profilaktikasi instituti ilmiy xodimlari tomonidan tekshirilib, tasdiqlandi.
Bu esa oziq–ovqat sanoatida yangi sifatli yog‘ mahsuloti paydo bo‘lishiga olib keldi.
Izoh (0)