Toshkentda 22-iyun kuni tadbirkorlar, fermerlar va hunarmandlar o‘rtasidagi “Tashabbus—2019” ko‘rik-tanlovining olti nafar g‘olibiga Prezident sovrini — Spark avtomobillari topshirildi, deya xabar bermoqda “Daryo” muxbiri.
Tanlovning tuman (shahar) bosqichi 22-aprel—15-may kunlari bo‘lib o‘tgan bo‘lsa (unda 960 nafar tadbirkor, fermer va hunarmand qatnashgan), Qoraqalpog‘iston Respublikasi, viloyatlar va Toshkent shahar bosqichi 20-may—12-iyun kunlari bo‘lib o‘tgan edi. “O‘zekspomarkaz” majmuasida 20—21-iyun kunlari o‘tkazilgan respublika bosqichida g‘oliblikka da’vogar 69 nafar ishtirokchi qatnashdi — ularning 41 nafari tadbirkor, 14 nafari hunarmand va 13 nafari fermer.
Respublika bosqichida beshta asosiy yo‘nalishlar bo‘yicha 1, 2, 3-o‘rin g‘oliblari aniqlanadi. 3-o‘rin sohiblariga bronza medali va 15 million so‘mdan pul mukofoti, 2-o‘rin sohiblariga esa kumush medali va 20 millon so‘mdan pul mukofoti topshirildi. Quyidagi yo‘nalishlar bo‘yicha 1-o‘rin sohiblari oltin medal, “Tashabbus” ko‘rik-tanlov haykalchasi va Prezident sovg‘asi — Spark avtomobillari bilan mukofotlandi:
- “Sanoat sohasida yilning eng yaxshi tadbirkori” — Nafis tex group kompaniyasi rahbari Ahadxon Eshonov, Namangan viloyati;
- “Xizmat ko‘rsatish sohasida yilning eng yaxshi tadbirkori” — Sitora Imkon Plus kompaniyasi rahbari Nargiza Salomova, Qashqadaryo viloyati;
- “Yilning eng yaxshi yosh tadbirkori” — Export Fish Product kompaniyasi rahbari Obidjon Saidov, Navoiy viloyati;
- “Yilning eng yaxshi fermeri” — Mehnat-Faravon Hayot fermer xo‘jaligi rahbari Abdusamat Norboyev, Surxondaryo viloyati;
- “Yilning eng yaxshi hunarmandi” yo‘nalishi bo‘yicha ikkita hunarmandga 1-o‘rin berildi — Davron Toshev (Buxoro viloyati) va Shavkat Yusupov (Toshkent viloyati).
Izoh (0)