Sirdaryolik g‘allakorlar 21-iyun kuni g‘alla xirmonini 191 387 tonnaga yetkazdi va shartnomaviy rejani 100,4 foizga bajardi. Viloyat hokimligi axborot xizmati xabariga ko‘ra, viloyat tarixida ilk bor g‘alla bo‘yicha shartnomaviy reja 15 ish kunida bajarildi.
Sirdaryo viloyatida bu yil 1992 nafar fermer xo‘jaligi tomonidan 85 ming gektar maydonga g‘alla ekilgan edi. 2019-yilgi g‘alla o‘rim-yig‘im mavsumiga 360 ta g‘alla o‘rish kombayni jalb etilib, 168 ta otryad shakllantirildi. Mazkur otryadlarda tuman hokimliklari, ichki ishlar bo‘limi xodimlari va boshqa tashkilotlardan iborat 1638 nafar mas’ul hamda 1416 ta yuk avtomobili,103 ta ko‘chma ustaxona va 114 ta yonilg‘i tashish vositalari xizmat qilgan.
“Shuningdek, sirdaryolik fermerlarimizning yangi zamonaviy hamda Xorazm viloyatidan yordamga kelgan o‘rim kombaynlari tomonidan o‘rilgan g‘alla viloyatning shartnomaviy rejasini sharaf bilan uddalanishida katta hissa qo‘shganligini alohida e’tirof etamiz”, — deyiladi hokimlik axborotida. Qayd etishlaricha, g‘alla hosilini yetishtirish va davlatga don sotish bo‘yicha shartnomaviy rejalarni Mirzaobod, Sardoba va Xovos tumanlari dehqon va fermerlari birinchilardan bo‘lib bajargan.
Boyovut tumanidagi “Ezgu niyat samarasi”, “Xumo hamkor” fermer xo‘jaliklari hosildorlikni 80 sentnerga yetkazib, rejani 125 foizga, Sirdaryo tumanidagi “Xasan Chiltonov” fermer xo‘jaligi dehqonlari hosildorlikni 75 sentnerga yetkazib, rejani 120 foizga, “Ergash Eshonqulov” fermer xo‘jaligi 72 sentnerdan hosil yig‘ib-terib olib, rejani 122 foizga, Sayxunobod tumanidagi “Shohista Olimjonovna” fermer xo‘jaligi jamoasi 75 sentnerlik marrani egallab, rejani 120 foizga, “Abduvoit ota” fermer xo‘jaligi hosildorlikni 70 sentnerga yetkazib, rejani 123 foizga bajargan.
Xayriddin Eshmurodov, Qahramon Ho‘jamqulov, Qilich Doniyorov, Begzod Abdurasulov singari kombayn operatorlari kuniga 100—120 tonnadan g‘alla donini o‘rib, qayd etishlaricha, “davlat shartnoma rejasining bajarilishiga o‘zlarining katta hissalarini qo‘shdi”. “Sirdaryo fermerlari Prezident va hukumatning xalq farovonligi yo‘lida olib borayotgan siyosatiga amal qilgan holda, hosildorlikni 55 sentnerga yetkazishni maqsad qilgan”, — deb qo‘shimcha qilingan rasmiy axborotda.
Izoh (0)