Turkiyada davlat to‘ntarishi ishi bo‘yicha 200 dan ortiq kishi umrbod qamoq jazosiga hukm qilindi

Anqara sudi 2016-yil iyuldagi davlat to‘ntarishi ishi bo‘yicha 200 dan ortiq kishini umrbod qamoq jazosiga hukm qildi, deb xabar berdi “TASS”.

Yetti nafar general 114-martadan umrbod qamoq jazosini oldi. Ular orasida harbiy-havo kuchlari sobiq qo‘mondoni Akin O‘zturk, brigada generali Hoqon Evrim hamda jandarmeriya brigadalaridan birining qo‘mondoni Ali Usmon Gurjan bor.

Qolgan sudlanuvchilar bir martadan umrbod qamoq jazosiga hukm qilindi. Ishi tergovda bo‘lgan 33 kishi oqlandi. FETO rahbari Fathulloh Gulen va yana 12 kishining ishi keyingi majlisda ko‘riladigan bo‘ldi.

2016-yil 15-iyulda bir guruh harbiylar davlat to‘ntarishini amalga oshirishga uringandi. Asosiy to‘qnashuvlar Istanbul va Anqarada bo‘lgan, isyonchilarni hisoblamaganda 250 kishi halok bo‘lgan, 2 mingdan ortiq kishi yaralangandi. Anqara davlat to‘ntarishiga urinishda FETO tashkilotini ayblagan.