Toshkent Fotosuratlar uyida Turkiyaning O‘zbekistondagi elchixonasi matbuot xizmati tomonidan “Turkiya o‘zbekistonlik jurnalist va fotorassomlar nigohida” mavzusida fotoko‘rgazma ochildi. Bu haqda “Xalq so‘zi” xabar berdi.
Fotoko‘rgazmani o‘tkazishdan asosiy maqsad turk madaniyati, urf-odatlari, marosimlari va me’morchilik an’analari bilan yaqinroq tanishtirish va davlatlar o‘rtasidagi madaniy aloqalarni kuchaytirishdan iborat.
Turkiyaning O‘zbekistondagi elchixonasi o‘tgan ikki yil mobaynida 30 nafarga yaqin o‘zbek jurnalistining Turkiyada tashkil qilingan turli tadbirlarda ishtirok etishiga ko‘maklashdi. Ijodkorlar Turkiyaning shahar va qishloqlarida bo‘lib, turk xalqining yashash tarzi, tabiati, me’morchiligi haqida bir-biridan qiziqarli fotosuratlarni muhrladi. Ko‘rgazma uchun ular tomonidan 500 ga yaqin surat taqdim qilinib, saralash jarayonida jurnalist nigohi qaratilgan obyektning dolzarbligi, mavzuning ahamiyati va asarning texnik sifatiga e’tibor berildi.
Tursunali Qo‘ziyev, Farhod Qurbonboyev, Husniddin Ato, Abduvali Soyibnazarov, Anora Sodiqova, Baxtiyor Nasimov, Davronbek Tojialiyev, Elmurod Ermatov, Hojimurod Otaqulov, Hotam Mamadaliyev, Muhammad Ismoil, Muhammadjon G‘aniyev, Sharofiddin To‘laganov, Shavkat Ortiqov, Sherali Avezmatov, To‘lqin Eshbek kabi jurnalistlarning asarlari o‘zbekistonlik fotosurat ishqibozlarini befarq qoldirmaydi.
“Turkiya o‘zbekistonlik jurnalist va fotorassomlar nigohida” fotoko‘rgazmasi 14-aprelga qadar davom etadi.
Foto: O‘zA
Izoh (0)