AQShning Klinton shahri va Navoiy viloyatining Zarafshon shahri o‘rtasida birodarlashgan shaharlar to‘g‘risida kelishuv imzolanishi rejalashtirilmoqda. Bu haqda O‘zbekistonning AQShdagi elchisi Javlon Vahobov Navoiy viloyati hokimi bilan o‘tkazilgan videokonferensaloqada ma’lum qildi, deya xabar beradi “Xalq so‘zi”.
Mazkur muloqot hududlarda xorijiy investitsiyalarning o‘z vaqtida samarali o‘zlashtirilishini ta’minlash borasida yangi nazorat tizimi joriy etish, haftaning har chorshanba kunini “Investorlar kuni” sifatida belgilash topshirig‘i ijrosi doirasida o‘tkazildi.
J. Vahobovning aytishicha, 15—16-may kunlari viloyatda AQSh ishbilarmon doiralari vakillari bilan o‘tkaziladigan forumda 100 dan ortiq tadbirkor qatnashish istagini bildirgan. Muloqotda O‘zbekiston tomonidan ular bilan hamkorlik qiladigan korxonalar ro‘yxatini shakllantirish hamda B2B shaklidagi uchrashuvlarni tashkil etishga kelishib olindi.
Shuningdek, davlat rahbarining Navoiy viloyatiga tashrifi doirasida ma’qullangan xorijlik ishbilarmonlar bilan hamkorlikdagi investitsion loyihalarning ijrosi ta’minlanishi, yuzaga kelayotgan masalalar va ularning yechimi ham muhokama qilindi.
Izoh (0)