14-aprel kuni Litvada 200 kg osh damlanadi, bu mamlakat uchun rekord bo‘ladi

Litvaning Kaunas shahrida 14-aprel kuni mamlakat uchun rekord darajadagi — 200 kilogrammdan ziyodroq osh damlanadi. Bu haqda Facebook’dagi “Osh — ko‘tarma bosh” guruhiga litvalik foydalanuvchi (va oshpaz) Darius Lileikis yozib qoldirdi.

“Litva uchun osh rekordi bo‘ladi. To‘g‘ri, O‘zbekiston uchun bu kam — 200 dan ortiqroq. Men bundan ham ko‘prog‘ini pishirgan bo‘lardim. Ammo Olmaliq kon-metallurgiya kombinatining narxi menga to‘g‘ri kelmadi. Ular 1000 litrli cho‘yan qozon uchun 21 500 yevro so‘radi, buni men uyatli narx deb hisoblayman. Ammo o‘zbek hamkasblarim bilan birga 14-aprel kuni Kaunasdagi yarmarkada Litva, O‘zbekiston va Tojikiston bayroqlari ostida mamnuniyat bilan osh damlashimdan faxrlanaman. Va bu Litva uchun rekord bo‘ladi”, — deb yozdi Darius Lileikis.