Jahongir Ortiqxo‘jayevning The Guardian’ga javobi, Sudanda boshqaruvni o‘z qo‘liga olgan mudofaa vaziri, Shahrisabzdagi bolalar hayoti uchun xavfli bog‘cha va kunning boshqa xabarlari

12-aprelning e’tiborga molik yangiliklari — “Daryo” dayjestida.

Jahongir Ortiqxo‘jayev uylar ogohlantirishsiz buzilayotgani haqidagi maqoladan so‘ng The Guardian’ga javob qaytardi.

“Uylarda yashovchilar uylar buzilishi haqida ogohlantirilmagan, deb ishonch bilan ta’kidlashning o‘zi noto‘g‘ri. Ularning barchasi, ayrimlari esa ikki yil oldindan xabarnoma olgan...

Toshkentda hech bir ko‘chmas mulk o‘z-o‘zidan buzilayotgani yo‘q. Turar-joylar og‘ir ahvolga kelib qolgan, eskirib qolgandagina bunday ishlar amalga oshirilmoqda...

Biz The Guardian gazetasi jurnalistlarini ajoyib shahrimiz haqida ko‘proq bilish uchun yana Toshkentga kelish va tegishli hokimiyat vakillari bilan uchrashishga taklif etamiz”, — deyiladi Toshkent shahar hokimi Jahongir Ortiqxo‘jayevning javobida.

***

Sudan mudofaa vaziri mamlakat boshqaruvini o‘z qo‘liga oldi.

Avad ibn Auf mamlakatda uch oy davom etadigan favqulodda holat joriy etilishini bildirdi.

Shuningdek, hukumatni shakllantirish uchun ikki yillik o‘tish davri ham belgilandi.

Internetda esa Rim papasi Sudan muxolifati yetakchilarining oyoqlaridan o‘pib, ortiqcha qon to‘kmaslikni so‘rayotgani aks etgan surat tarqaldi.

***

“Farzandlarimiz bu binoda tarbiyalanayotganidan qo‘rqamiz”. Shahrisabzda 1940-yilda qurilgan bog‘cha bolalar hayoti uchun xavfli holatga kelib qolgan.

— Qurilganiga 80 yil bo‘lgan 35 o‘rinli bog‘chamizda 75 nafar bola ta’lim-tarbiya olmoqda, — deydi murojaatchi ota-onalardan biri Fotima Tursunova. – O‘tgan davr mobaynida bog‘cha biror marta ham ta’mirlanmagan. Mashg‘ulot xonalari qorong‘i, zax va bolalarimiz hayoti uchun juda xavfli holatga kelib qolgan. Ushbu muammoni yechish uchun 5 yildan beri mutasaddilar eshigini qoqamiz. Ammo foydasi bo‘lmayapti. Hech kim e’tibor qaratmaydi.

***

O‘zbekistonda eng ko‘p noqonuniy xarajatlarga yo‘l qo‘ygan vazirlik va idoralar ma’lum bo‘ldi.

Vazirlik va idoralar kesimida eng ko‘p miqdorda aniqlangan qonunbuzilish holatlari quyidagicha:

Oliy va o‘rta maxsus ta’limi vazirligi tizimida qonunbuzilish holatlari miqdori 6,2 milliard so‘mni tashkil etib, shundan 4,9 milliard so‘mi budjetga tiklandi;

Xalq ta’limi vazirligi tizimida qonunbuzilish holatlari miqdori 3,7 milliard so‘mni tashkil etib, shundan 3 milliard so‘mi budjetga tiklandi.

***

Jondor-Qorako‘l trassasida Turkiya yuk mashinasi ag‘darilib ketdi.

Dastlabki ma’lumotlarga ko‘ra, haydovchi rulda uxlab qolgan.

Halokat oqibatida jabrlanganlar va qurbonlar haqida hozircha ma’lumot yo‘q.