Жаҳонгир Ортиқхўжаевнинг The Guardian’га жавоби, Суданда бошқарувни ўз қўлига олган мудофаа вазири, Шаҳрисабздаги болалар ҳаёти учун хавфли боғча ва куннинг бошқа хабарлари

12 апрелнинг эътиборга молик янгиликлари — «Дарё» дайжестида.

Жаҳонгир Ортиқхўжаев уйлар огоҳлантиришсиз бузилаётгани ҳақидаги мақоладан сўнг The Guardian’га жавоб қайтарди.

«Уйларда яшовчилар уйлар бузилиши ҳақида огоҳлантирилмаган, деб ишонч билан таъкидлашнинг ўзи нотўғри. Уларнинг барчаси, айримлари эса икки йил олдиндан хабарнома олган...

Тошкентда ҳеч бир кўчмас мулк ўз-ўзидан бузилаётгани йўқ. Турар-жойлар оғир аҳволга келиб қолган, эскириб қолгандагина бундай ишлар амалга оширилмоқда...

Биз The Guardian газетаси журналистларини ажойиб шаҳримиз ҳақида кўпроқ билиш учун яна Тошкентга келиш ва тегишли ҳокимият вакиллари билан учрашишга таклиф этамиз», — дейилади Тошкент шаҳар ҳокими Жаҳонгир Ортиқхўжаевнинг жавобида.

***

Судан мудофаа вазири мамлакат бошқарувини ўз қўлига олди.

Авад ибн Ауф мамлакатда уч ой давом этадиган фавқулодда ҳолат жорий этилишини билдирди.

Шунингдек, ҳукуматни шакллантириш учун икки йиллик ўтиш даври ҳам белгиланди.

Интернетда эса Рим папаси Судан мухолифати етакчиларининг оёқларидан ўпиб, ортиқча қон тўкмасликни сўраётгани акс этган сурат тарқалди.

***

«Фарзандларимиз бу бинода тарбияланаётганидан қўрқамиз». Шаҳрисабзда 1940 йилда қурилган боғча болалар ҳаёти учун хавфли ҳолатга келиб қолган.

— Қурилганига 80 йил бўлган 35 ўринли боғчамизда 75 нафар бола таълим-тарбия олмоқда, — дейди мурожаатчи ота-оналардан бири Фотима Турсунова. – Ўтган давр мобайнида боғча бирор марта ҳам таъмирланмаган. Машғулот хоналари қоронғи, зах ва болаларимиз ҳаёти учун жуда хавфли ҳолатга келиб қолган. Ушбу муаммони ечиш учун 5 йилдан бери мутасаддилар эшигини қоқамиз. Аммо фойдаси бўлмаяпти. Ҳеч ким эътибор қаратмайди.

***

Ўзбекистонда энг кўп ноқонуний харажатларга йўл қўйган вазирлик ва идоралар маълум бўлди.

Вазирлик ва идоралар кесимида энг кўп миқдорда аниқланган қонунбузилиш ҳолатлари қуйидагича:

Олий ва ўрта махсус таълими вазирлиги тизимида қонунбузилиш ҳолатлари миқдори 6,2 миллиард сўмни ташкил этиб, шундан 4,9 миллиард сўми бюджетга тикланди;

Халқ таълими вазирлиги тизимида қонунбузилиш ҳолатлари миқдори 3,7 миллиард сўмни ташкил этиб, шундан 3 миллиард сўми бюджетга тикланди.

***

Жондор-Қоракўл трассасида Туркия юк машинаси ағдарилиб кетди.

Дастлабки маълумотларга кўра, ҳайдовчи рулда ухлаб қолган.

Ҳалокат оқибатида жабрланганлар ва қурбонлар ҳақида ҳозирча маълумот йўқ.