Xabar berganimizdek, bugun, 24-mart kuni erta tongda Toshkentning Afrosiyob va Beshyog‘och ko‘chalari kesishmasida (Humo arena muz saroy oldida) “Navro‘z” xalqaro yarim marafoni start olgan edi.
Dunyoning 28 mamlakatidan jami 1 500 nafar ishtirokchilar ikki xil masofa – 5 va 21,097 kmdan birini tanlab qatnashish imkoniyatiga ega bo‘ldi.
Turnirda ishtirok etish xohishini bildirib, 1658 nafar ishtirokchi ro‘yxatdan o‘tgan edi (21 km masofaga 610 nafar, 5 km masofaga 1048 nafar), ularning orasida Avstriya, Belgiya, Xitoy, Estoniya, Fransiya, Qozog‘iston, Qirg‘iziston, Rossiya va boshqa mamlakatlarning vakillarini ko‘rish mumkin.
Yarim marafonda Qirg‘izistonlik Darya Maslova eng yaxshi natijani qayd etdi — 1:12:30. Ikkinchi o‘rin O‘zbekistonlik Sitora Hamidova 1:13:56, uchinchi o‘rin esa yana bir hamyurtimiz Yekaterina Tunguskovaga nasib etdi — 1:16:13.
Erkaklar o‘rtasidagi yarim marafonda birinchi o‘rinni Xitoy vakili Lintsyan Yan 1:04:43 vaqt bilan qayd etgan bo‘lsa, qirg‘izistonlik Adilet Kishtakbekov 1:05:03 natija bilan ikkinchi o‘rinni, O‘zbekistonlik Andrey Popov esa 1:05:20 bilan qo‘lga kiritdi.
5 km masofaga yugurish musobaqalarida hamyurtlarimiz shohsupani mutlaq egalldi. Azizaxon Mirzabekova birinchi (0:19:03), Shohsanam Xurramova ikkinchi (0:19:03), Marjona Baratova uchinchi (0:19:19) bo‘lishdi.
Erkaklar o‘rtasida ushbu masofada Otabek Toshquvvatov birinchi (0:16:41), Humoyun Mahmudov ikkinchi (0:16:54) va Xurshid Ahmadaliyev uchinchi (0:16:57) o‘rinlarni egalldi.
Musobaqani O‘zbekiston davlat jismoniy tarbiya va sport vazirligi, Toshkent shahar hokimligi, Milliy Olimpiya qo‘mitasi, Yengil atletika federatsiyasi va Yoshlar ittifoqi o‘zaro hamkorlikda tashkil etdi.
Izoh (0)