24-mart kuni soat 10:00 dan boshlab Toshkentdagi “Ashxobod” istirohat bog‘ida noyob retro-avtomobillar ko‘rgazmasi bo‘lib o‘tmoqda. “Daryo” fotojurnalisti Madina Nurmanova ko‘rgazmadan fotoreportaj tayyorladi.
Unda tashrif buyuruvchilar bundan 50—60 yillar muqaddam ishlab chiqarilgan urushgacha va urushdan keyingi avtomobillar, shuningdek, nodir mototsikllarni tomosha qilishi mumkin. Ular orasida Gaz MM (Polutorka, 1938), GAZ 67B (1943), Moskvich 401 (1954), Moskvich 410 (1957), GAZ-M20B (Victory, 1946) va boshqalar bor. Bundan tashqari, o‘tgan asrning afsonaviy motosikllari, jumladan, IJ Planeta-2 (1964), Minsk (1962), Dnepr (1950) va boshqalar mavjud.
Aytish kerakki, Retro.uz havaskorlar klubi tomonidan o‘tkazilayotgan ayni ko‘rgazma birinchisi emas.
Botir Azimov, Retro.uz havaskorlar klubi rahbari o‘rinbosari:
— Ayni klubimiz 2015-yilda Adliya vazirligidan ro‘yxatdan o‘tgan kunidan e’tiboran bugungacha retro avtomobillarga qiziquvchi havaskorlarning sevimli joyiga aylanib ulgurgan. Bu yerda ular eski avtomobillarni ta’mirlab, parvarishlab, ularning holatini muntazam ravishda nazorat qilib turishlari mumkin. Albatta, bungacha klubimiz norasmiy faoliyat yuritgan va a’zolarimiz o‘zlariga qulay vaqtda kelib, tasodifiy tarzda uchrashuvlar tashkil etib turishgan. Asosiy maqsadimiz tarixiy sanalgan ushbu avtomobil va motosikllarni ta’mirlash, ularni asrab qolib, kelgusi avlodlarga ham yetkazib, ko‘rsatish.
Bugungi ko‘rgazma ham ayni maqsadga yo‘naltirilgan bo‘lib, 15 ta avtomobil, 9 ta retro motosikllarni taqdim etganmiz. Ularning orasida eng “qariya” avtomobillardan biri 1940-yillarda chiqqan Gaz MM (Polutorka, 1938) sanaladi. U Buxoro viloyati cho‘llaridan avvalgi sohibi tomonidan qazib olingan, ta’mirlangan va bizga yetib kelgan, birinchi egasi ta’mirlashni bas qilganidan so‘ng tashlandiq holda tashlab ketilgani sababli uzoq yillar qum ostida yotgan.
GAZ 67B (1943) esa Ikkinchi jahon urushi maydonlarida ishlatilgan, keyin Toshkentda keltirilgan va foydalanilishda davom ettirilgan, keyin bizning klubimizga kelgan.
Yana bizda maxsus, urush sharoitlariga moslashtirilgan harakatlanadigan avtomobil-oshxona bor. U askarlarni boqish uchun masofalarni bosib o‘tgan eski ulov hisoblanadi. Xullas, tashrif buyuruvchilar kelib o‘z ko‘zlari bilan o‘tmishimizdagi avtoulovlar haqida qiziqarli ma’lumotlar olishi mumkin.
Retro avtomobillar ko‘rgazmasi bugun soat 22:00 da yopiladi.
Izoh (0)