Afg‘onistonning Mozori Sharif shahrida o‘tkazilgan Navro‘z bayrami tantanasida Surxondaryo viloyati hokimining o‘rinbosari Ro‘zimurod Choriyev boshchiligidagi delegatsiya ishtirok etdi. Bu haqda “Daryo”ga viloyat hokimligi axborot xizmati ma’lum qildi.
Mozori Sharifdagi Hazrat Ali maqbarasi atrofida o‘tkazilgan tadbirda Afg‘oniston prezidenti Muhammad Ashraf G‘ani qatnashib, barchani ayyom bilan muborakbod etdi. Shundan so‘ng milliy marosimlarga keng o‘rin berildi.
Bayram davomida zambaraklardan to‘plar otilib, vertolyotlar orqali tabrik xatlari tarqatildi. Samolyotlar yordamida amalga oshirilgan mushakbozlik esa ayyom qatnashchilarida katta taassurot qoldirdi.
Viloyat delegatsiyasi tashrif davomida O‘zbekistonning Afg‘onistondagi konsullik idorasi, shuningdek, Balx viloyati hokimligi qarorgohida ham bo‘ldi.
Izoh (0)