24 март куни соат 10:00 дан бошлаб Тошкентдаги «Ашхобод» истироҳат боғида ноёб ретро-автомобиллар кўргазмаси бўлиб ўтмоқда. «Дарё» фотожурналисти Мадина Нурманова кўргазмадан фоторепортаж тайёрлади.
Унда ташриф буюрувчилар бундан 50—60 йиллар муқаддам ишлаб чиқарилган урушгача ва урушдан кейинги автомобиллар, шунингдек, нодир мотоциклларни томоша қилиши мумкин. Улар орасида Газ ММ (Полуторка, 1938), ГАЗ 67Б (1943), Москвич 401 (1954), Москвич 410 (1957), ГАЗ-М20Б (Victory, 1946) ва бошқалар бор. Бундан ташқари, ўтган асрнинг афсонавий мотоцикллари, жумладан, ИЖ Планета-2 (1964), Минск (1962), Днепр (1950) ва бошқалар мавжуд.
Айтиш керакки, Retro.uz ҳаваскорлар клуби томонидан ўтказилаётган айни кўргазма биринчиси эмас.
Ботир Азимов, Retro.uz ҳаваскорлар клуби раҳбари ўринбосари:
— Айни клубимиз 2015 йилда Адлия вазирлигидан рўйхатдан ўтган кунидан эътиборан бугунгача ретро автомобилларга қизиқувчи ҳаваскорларнинг севимли жойига айланиб улгурган. Бу ерда улар эски автомобилларни таъмирлаб, парваришлаб, уларнинг ҳолатини мунтазам равишда назорат қилиб туришлари мумкин. Албатта, бунгача клубимиз норасмий фаолият юритган ва аъзоларимиз ўзларига қулай вақтда келиб, тасодифий тарзда учрашувлар ташкил этиб туришган. Асосий мақсадимиз тарихий саналган ушбу автомобиль ва мотоциклларни таъмирлаш, уларни асраб қолиб, келгуси авлодларга ҳам етказиб, кўрсатиш.
Бугунги кўргазма ҳам айни мақсадга йўналтирилган бўлиб, 15 та автомобиль, 9 та ретро мотоциклларни тақдим этганмиз. Уларнинг орасида энг «қария» автомобиллардан бири 1940 йилларда чиққан Газ ММ (Полуторка, 1938) саналади. У Бухоро вилояти чўлларидан аввалги соҳиби томонидан қазиб олинган, таъмирланган ва бизга етиб келган, биринчи эгаси таъмирлашни бас қилганидан сўнг ташландиқ ҳолда ташлаб кетилгани сабабли узоқ йиллар қум остида ётган.
ГАЗ 67Б (1943) эса Иккинчи жаҳон уруши майдонларида ишлатилган, кейин Тошкентда келтирилган ва фойдаланилишда давом эттирилган, кейин бизнинг клубимизга келган.
Яна бизда махсус, уруш шароитларига мослаштирилган ҳаракатланадиган автомобиль-ошхона бор. У аскарларни боқиш учун масофаларни босиб ўтган эски улов ҳисобланади. Хуллас, ташриф буюрувчилар келиб ўз кўзлари билан ўтмишимиздаги автоуловлар ҳақида қизиқарли маълумотлар олиши мумкин.
Ретро автомобиллар кўргазмаси бугун соат 22:00 да ёпилади.
Изоҳ (0)