Senat yalpi majlisida hukumat qarorlari bilan tasdiqlangan hududlarni kompleks rivojlantirish dasturlari ijrosi bilan bog‘liq qator muammolar borligi qayd etildi. Bu haqda O‘zA xabar berdi.
— Odamlar qog‘ozlarda qolib ketadigan qarorlarning nima keragi bor edi, yuqori darajalarda tasdiqlangan dasturlar ijrosi uchun mas’uliyat va javobgarlikni kim o‘z zimmasiga oladi, degan ko‘plab keskin va haqli savollarni o‘rtaga tashlamoqda, — dedi Senat raisi Nig‘matilla Yo‘ldoshev. — Mazkur masalani kengroq o‘rganish maqsadida deyarli barcha viloyatlardagi 30 dan ziyod tumanlarni kompleks rivojlantirishga oid chora-tadbirlar dasturlarining ijrosini tahlil qilganimizda, ushbu e’tirozli savollarning o‘rinli ekanligiga amin bo‘ldik.
Jumladan, dasturlardagi 2017-19 yillarga mo‘ljallangan va respublika darajasida hal qilinishi belgilangan qator muhim vazifalar ijrosi o‘z vaqtida va to‘liq ta’minlanmagan.
2017—2018-yillarda bajarilishi lozim bo‘lgan, lekin amalga oshirilmagan vazifalarning aksariyati aholi kayfiyatiga bevosita ta’sir qiluvchi ijtimoiy sohalarga taalluqli masalalardir.
Misol uchun, o‘nlab bog‘cha va maktablarda qurilish-ta’mirlash ishlarini amalga oshirishda Jalaquduq, Peshku, Romitan, Olot, Oltinsoy, Qibray, Chilonzor, Sergeli tumanlarida sustkashlikka yo‘l qo‘yilgan.
Shuningdek, Qibray, Olmaliq, Dehqonobod, Mirishkor, Jalaquduq tumanlaridagi tibbiyot muassasalarini, ayniqsa, mahallalar va qishloqlardagi poliklinikalarni ta’mirlash va zarur tibbiy jihozlar bilan ta’minlashga oid vazifalar ijrosi e’tibordan chetda qolgan.
Aholining uy-joy sharoitlarini yaxshilash, kommunal xizmatlar, jumladan, ichimlik suvi, elektr energiyasi va gaz ta’minoti sifatini oshirish hamda yo‘l qurilishiga doir dolzarb vazifalar ijrosi ham talab darajasida emas.
Mutasaddilarning mas’uliyatsizligi oqibatida Toshkent tumanini kompleks rivojlantirish dasturiga muvofiq kam ta’minlangan aholi hamda yosh oilalar uchun qurilishi belgilangan 6 ta ko‘p qavatli uy qurilmagan.
Senat raisi bu kabi kamchiliklarni tanqid ostiga olar ekan, ularni bartaraf etish uchun zarur choralar ko‘rilishi zarurligiga e’tibor qaratdi.
Izoh (0)