O‘zbekistonda hukumat a’zolari nomzodi Qonunchilik palatasida ma’qullanganidan keyin Prezident tomonidan lavozimga tasdiqlanishi tartibi joriy etildi

Oliy Majlis Senati yalpi majlisida “Hukumatni shakllantirish tartibi demokratlashtirish va uning mas’uliyati kuchaytirilishi munosabati bilan O‘zbekiston Respublikasining ayrim qonun hujjatlariga o‘zgartish va qo‘shimchalar kiritish to‘g‘risida“gi qonun ma’qullandi. Bu haqda O‘zA xabar bermoqda.

Qonun hukumat ishini tashkil etishni tubdan yaxshilash, ijro etuvchi hokimiyat organlarining bugungi kun talabiga javob beradigan, sifat jihatidan yangi tizimini shakllantirishga qaratilgan.

Unga ko‘ra, Vazirlar Mahkamasi a’zolari nomzodi Oliy Majlis Qonunchilik palatasi majlisida ko‘rib chiqilib, ma’qullanganidan keyingina Prezident tomonidan lavozimga tasdiqlanish tartibi joriy etilmoqda.

Barcha darajadagi ijro etuvchi hokimiyat organlari va ular rahbarlari faoliyatini aniq ko‘rsatkichlarga erishishga hamda iqtisodiyot tarmoqlari, ijtimoiy soha va boshqa sohalarni strategik rivojlantirishning yaqin, o‘rta va uzoq muddatli istiqbolga mo‘ljallangan dasturlari amalga oshirilishi sifati va samaradorligiga asoslangan holda baholash tizimi yaratiladi.

Prezidentning Oliy Majlisga Murojaatnomasidan kelib chiqadigan, tegishli yilga mo‘ljallangan davlat dasturi bajarilishi yuzasidan har chorak yakuni bilan hisobot taqdim etib borishlari to‘g‘risidagi tartib joriy etilmoqda.

So‘zga chiqqanlar qonunning qabul qilinishi hukumat faoliyati ustidan parlament nazoratini kuchaytirishga, Vazirlar Mahkamasini shakllantirishning demokratik tartib-taomillarini ta’minlashini ta’kidladi.