Сенат ялпи мажлисида ҳукумат қарорлари билан тасдиқланган ҳудудларни комплекс ривожлантириш дастурлари ижроси билан боғлиқ қатор муаммолар борлиги қайд этилди. Бу ҳақда ЎзА хабар берди.
— Одамлар қоғозларда қолиб кетадиган қарорларнинг нима кераги бор эди, юқори даражаларда тасдиқланган дастурлар ижроси учун масъулият ва жавобгарликни ким ўз зиммасига олади, деган кўплаб кескин ва ҳақли саволларни ўртага ташламоқда, — деди Сенат раиси Ниғматилла Йўлдошев. — Мазкур масалани кенгроқ ўрганиш мақсадида деярли барча вилоятлардаги 30 дан зиёд туманларни комплекс ривожлантиришга оид чора-тадбирлар дастурларининг ижросини таҳлил қилганимизда, ушбу эътирозли саволларнинг ўринли эканлигига амин бўлдик.
Жумладан, дастурлардаги 2017-19 йилларга мўлжалланган ва республика даражасида ҳал қилиниши белгиланган қатор муҳим вазифалар ижроси ўз вақтида ва тўлиқ таъминланмаган.
2017—2018 йилларда бажарилиши лозим бўлган, лекин амалга оширилмаган вазифаларнинг аксарияти аҳоли кайфиятига бевосита таъсир қилувчи ижтимоий соҳаларга тааллуқли масалалардир.
Мисол учун, ўнлаб боғча ва мактабларда қурилиш-таъмирлаш ишларини амалга оширишда Жалақудуқ, Пешку, Ромитан, Олот, Олтинсой, Қибрай, Чилонзор, Сергели туманларида сусткашликка йўл қўйилган.
Шунингдек, Қибрай, Олмалиқ, Деҳқонобод, Миришкор, Жалақудуқ туманларидаги тиббиёт муассасаларини, айниқса, маҳаллалар ва қишлоқлардаги поликлиникаларни таъмирлаш ва зарур тиббий жиҳозлар билан таъминлашга оид вазифалар ижроси эътибордан четда қолган.
Аҳолининг уй-жой шароитларини яхшилаш, коммунал хизматлар, жумладан, ичимлик суви, электр энергияси ва газ таъминоти сифатини ошириш ҳамда йўл қурилишига доир долзарб вазифалар ижроси ҳам талаб даражасида эмас.
Мутасаддиларнинг масъулиятсизлиги оқибатида Тошкент туманини комплекс ривожлантириш дастурига мувофиқ кам таъминланган аҳоли ҳамда ёш оилалар учун қурилиши белгиланган 6 та кўп қаватли уй қурилмаган.
Сенат раиси бу каби камчиликларни танқид остига олар экан, уларни бартараф этиш учун зарур чоралар кўрилиши зарурлигига эътибор қаратди.
Изоҳ (0)